ប្រិយមិត្ត​អ្នក​បើក​ប្រើ Facebook ជាប់ តើ​មាន​ជួប​បញ្ហា​ដូច​គ្នា​នេះ​ឬ​ទេ ក្នុង​ថ្ងៃ​នេះ? ​មិន​មែន​មាន​តែ​អ្នក​ជួប error កំពុង​តែ​ប្រើ ស្រាប់​តែ​លោត​ចេញ (logout) ដោយ​ខ្លួន​ឯង​នោះ។ តាម​សេចក្ដី​រាយការណ៍​ពី​គេហទំព័រ engadget ​ឱ្យ​ដឹង​ថា ប៉ុន្មាន​ម៉ោង​មុន បណ្ដាញ​សង្គម​យក្ស​នេះ មាន​បញ្ហា error ​ហើយ​ក៏​ត្រូវ​អះអាង​ដោយ​ក្រុមហ៊ុន Facebook ​ផ្ទាល់។

បញ្ហា error ​នៅ​លើ Facebook ​គឺ ធ្វើ​ឱ្យ​អ្នក​គណនី​ទាំងឡាយ ប្រើ​សុខៗ​ក៏ Logout ចេញ​ដោយ​ខ្លួន​ឯង វា​អាច​ជួប​ញឹកញាប់ Log ចូល​បាន​មួយ​ភ្លែត ក៏ Logout ​ចេញ​ដោយ​ស្វ័យ​ប្រវត្តិ។ ដោយសារ​បញ្ហា​នេះ ធ្វើ​ឱ្យ​អ្នក​ប្រើ​ជាច្រើន សង្ស័យ​មាន​ករណី​លួច​គណនី (account) របស់​គេ​ទៅ​ប្រើ។ ខាង​ក្រោម​នេះ ជា​សេចក្ដី​ថ្លែងការណ៍​ពី​ក្រុមហ៊ុន Facebook៖ “ព្រឹក​នេះ មាន​កំហុស error ​មួយ​ក្នុង​ប្រព័ន្ធ​របស់​យើង ដែល​ត្រូវ​បាន​ឌីហ្សាញ​ឡើង ដើម្បី​ជួយ​ទប់ស្កាត់​ការ​ភ្ជាប់​ចូល​របស់​គណនី​គួរ​ឱ្យ​សង្ស័យ​ ផ្ញើ​មនុស្ស​មួយ​ក្រុម​តូច ទៅ​កាន់​ផ្នែក account recovery flow ដោយ​មិន​មាន​ភាព​ចាំបាច់។ យើង​បាន​ជួសជុល​បញ្ហា​នេះ​រួច​ហើយ ​និង​កំពុង​ធ្វើការ​លុប​សម្អាត​ចេញ​នូវ​គណនី​ដែល​មាន​បញ្ហា​ទាំង​នោះ ពី​ផ្នែក recovery flow។ យើង​សុំទោស​ចំពោះ​ភាព​រអាក់រអួល​នេះ”។ បើ​តាម​ប្រភព​មួយ​ផ្សេង​ទៀត បាន​ឱ្យ​ដឹង​ថា នេះ​អាច​បណ្ដាល​មក​ពី​បញ្ហា​បច្ចេកទេស (តែ​ស្ដាប់​មើល​ទៅ វា​មិន​ខុស​នឹង Facebook អះអាង​នោះ​ទេ) ហើយ​គ្មាន​ហេតុផល​អ្វី ដែល​គិត​ថា គណនី Facebook របស់​អ្នក​ប្រឈម​ការ​វាយប្រហារ​នោះ ព្រោះ Facebook ក៏​បាន​ចេះ​មុខ​បកស្រាយ​រួច​ដែរ។   សូម​បញ្ជាក់​ថា បញ្ហា​បច្ចេកទេស មិន​មាន​កើត​មាន​តែ​នៅ​លើ Facebook ប៉ុណ្ណោះ​ទេ ប៉ុន្តែ​សេវាកម្ម Google ​ក៏​ហាក់​មាន​បញ្ហា​ស្រដៀង​គ្នា​ផង​ដែរ កាលពី​យប់​មិញ ដែល​អាច​ទាក់ទង​ទៅ​នឹង​បញ្ហា Google OnHub៕ ប្រែ​សម្រួល៖ រឺទ្ធិរាជ ប្រភព៖ engadget