កំប្លែងខ្លី៖ អាប្រុញចិត្តល្អម្ល៉េះថ្ងៃនេះ?
ប្រុញ និង ជ្រូចគឺជាមិត្តល្អនឹងគ្នា តាំងពីបឋមសិក្សាមកម្ល៉េះ ប៉ុន្តែរឿងមួយដែលធ្វើឲ្យ ជ្រូចមិនសូវជាពេញចិត្តនោះ គឺ ប្រុញជាមនុស្សគម្រិះ និង មិនដែលចែករបស់ញុំាដល់ជ្រូចនោះទេ។
ថ្ងៃមួយនៅពេលទៅសាលា មិត្តទាំងពីរបានពិភាក្សាគ្នាយ៉ាងច្រើនទាក់ទងនឹងការសិក្សា ក៏ដូចជាការត្រៀមខ្លួនចូលទៅវិស័យការងារ។
ក្នុងពេលកំពុងជជែកគ្នានោះ ស្រាប់តែប្រុញដកស្ករកៅស៊ូពីហោប៉ៅ ហើយហុចទៅជ្រូច។
ប្រុញនិយាយ៖ ញុំាទៅមិនបាច់ខ្លាចចិត្តអញទេ សម្លាញ់។
ជ្រូចតប៖ អគុណសម្លាញ់!
និយាយបណ្ដើរទំពាស្ករកៅស៊ូបណ្ដើរ លាយឡំជាមួយនឹងភាពរីករាយក្នុងចិត្ត ត្បិតអីនេះជាលើកទីមួយហើយដែលប្រុញឲ្យរបស់ញុំាដល់ខ្លួន។ ទ្រាំមិនបាន ជ្រូចក៏ដាច់ចិត្តសួរប្រុញ។
ជ្រូចសួរ៖ នែ!អាប្រុញ! អញស្គាល់ឯងយូរឆ្នាំហើយ តែអញកម្របានស្អីពីឯងណាស់ ជាពិសេសរបស់ញុំាតែម្ដង ចុះថ្ងៃនេះវាម៉េចឯងបាន ឲ្យស្ករកៅស៊ូអញ។
ប្រុញឆ្លើយ៖ លើកនេះអញដាច់ចិត្តឲ្យស្ករកៅស៊ូឯង ព្រោះបើអញមិនដាច់ចិត្តឲ្យស្ករកៅស៊ូឯងទេ អញមិនអាចនិយាយជាមួយឯងបានទៀតទេ......។
ជ្រូចតប៖ ម៉េចចឹងអ្ហា! ឯងក្លាយជាមនុស្សចិត្តល្អពីកាល! យ៉ាងណាក៏ដោយ អញក៏សប្បាយចិត្តដែរ ឃើញឯងប្រែក្លាយពីមនុស្សគម្រិះ ទៅជាមនុស្សចេះចែករំលែកចឹង។
ប្រុញតបវិញ ហើយសើច៖ ទេ!ទេ! កុំច្រឡំអញដាច់ចិត្តឲ្យឯងនេះ ព្រោះថា ក្លិនមាត់ឯងស្អុយដល់កម្រិតកំពូល។ និយាយឲ្យខ្លី ស្អុយលំដាប់ស្តង់ដារ! ស្អុយប្រហែលលូបង្គន់! ចឹងបើអញមិនឲ្យស្ករកៅស៊ូទេ ដឹងតែនិយាយគ្នាមិនកើតទេ៕
