បើមិនចង់ឆាប់ស្លាប់ទេ កុំភ្លេចអនុវត្តចំណុចសំខាន់ៗទាំងនេះឲ្យសោះ
របៀបនៃការរស់នៅប្រចាំថ្ងៃរបស់អ្នក មិនថាជាទម្លាប់ហូបចុក ការធ្វើលំហាត់ប្រាណ សកម្មភាពធ្វើនៅពេលទំនេរ និងទំនាក់ទំនងនៅក្នុងសង្គមនោះទេ សុទ្ធតែជាកត្តាដ៏ចម្បងមួយដែលមានឥទ្ធិពលទៅលើភាពចាស់ជរារបស់អ្នក។ អ្នកអាចនឹងកំពុងប្រើប្រាស់ជីវិតរបស់ខ្លួន ដែលទម្លាប់ទាំងឡាយរបស់អ្នកកំពុងបង្ខិតអ្នកទៅរកភាពចាស់ជរាយ៉ាងសន្សឹមៗដោយមិនដឹងខ្លួន។ តើទម្លាប់ល្អអ្វីខ្លះ ដែលចាត់ទុកថាមានឥទ្ធិពលវិជ្ជមានទប់ស្កាត់នូវភាពចាស់ជរារបស់អ្នកបាន ?
១) មិនត្រូវទទួលទានលើសកម្រិតនោះទេ៖ ជនជាតិជប៉ុនត្រូវបានគេទទួលស្គាល់ថាជាប្រជាជនដែលមានអាយុវែងជាងគេ។ តើតាមការស្រាវជ្រាវបានបង្ហាញពីទំនាក់ទំនងរវាងការរស់នៅបានយូរ និងទម្លាប់នៃការទទួលទានរបស់ពួកគេយ៉ាងដូចម្ដេច ? អ្នកនិពន្ធ Dan Buettner ដែលបានធ្វើការសិក្សាទៅលើភាពមានអាយុវែងជុំវិញពិភពលោក បានរកឃើញថា ប្រជាជនជប៉ុនដែលមានវ័យចំណាស់ជាងគេនោះ តែងបញ្ឈប់ការទទួលទាននៅពេលពួកគេឆ្អែតត្រឹមតែ៨០ភាគរយប៉ុណ្ណោះ។ ឯអ្នកស្រាវជ្រាវពី St. Louis University ក៏បានគាំទ្រនឹងគំនិតនេះផងដែរថា ការទទួលទានលើសកម្រិតនឹងធ្វើឲ្យការរំលាយអាហារប្រព្រឹត្តទៅយឺត នាំឲ្យវិវត្តទៅរកភាពចាស់ជរាលឿន។
២) កាត់បន្ថយការមើលទូរទស្សន៍៖ ការអង្គុយតែមួយកន្លែងមិនបញ្ចេញសកម្មភាពអ្វី នៅនឹងមុខទូរទស្សន៍ច្រើនម៉ោង មានផលប៉ះពាល់យ៉ាងអវិជ្ជមានជាខ្លាំងទៅលើអ្នក។ នៅរៀងរាល់ម៉ោងដែលអ្នកបន្ថែមទៅលើការមើលទូរទស្សន៍ អ្នកនឹងកំពុងតែបង្កើនហានិភ័យខិតទៅរកការស្លាប់១១ភាគរយ និងការស្លាប់ដោយសាររោគបេះដូង១៨ភាគរយហើយ។
៣) ចេញទៅបង្កើនទំនាក់ទំនងខាងក្រៅឲ្យបានច្រើន៖ អ្នកស្រាវជ្រាវបានអះអាងចំពោះផលប៉ះពាល់នៃការមិនភ្ជាប់ទំនាក់ទំនងឲ្យបានរឹងមាំជាមួយក្រុមគ្រួសារ និងមិត្តភ័ក្ដិដែលនឹងនាំមកនូវហានិភ័យយ៉ាងធ្ងន់ធ្ងរពីរោគបេះដូង។ នៅពេលទំនាក់ទំនងអ្នកកាន់តែឆ្ងាយពីមនុស្សសំខាន់ទៅ អ្នកនឹងទទួលអារម្មណ៍ឯកោយ៉ាងឆាប់រហ័ស ហើយភាពឯកោនេះទៀតសោតមានភាពគ្រោះថ្នាក់ប្រហាក់ប្រហែលទៅនឹងការកើនឡើងនៃកូឡេស្តេរ៉ុល និងការជក់បារីផងដែរ។
៤) ទទួលទានបន្លែ និងផ្លែឈើ៖ កន្លងមកប្រហែលមនុស្សមិនតិចនោះទេដែលតែងណែនាំអ្នកឲ្យទទួលទានបន្លែ និងផ្លែឈើឲ្យបានច្រើន ដើម្បីមានសុខភាពល្អ។ តើវាល្អយ៉ាងដូចម្ដេចខ្លះទៅ ចំពោះភាពមានអាយុវែងរបស់អ្នក ? បន្លែ និងផ្លែឈើមានផ្ទុកនូវជាតិសរសៃ និងជាប្រភពនៃវីតាមីន ដែលសុទ្ធតែដើរតួយ៉ាងសំខាន់ក្នុងការកាត់បន្ថយហានិភ័យពីរោគបេះដូងរហូតដល់៧៦ភាគរយ រួមទាំងមហារីកសុដន់ផងដែរ។ ម្យ៉ាងទៀត មុខងារប្រឆាំងនឹងអុកស៊ីតកម្មរបស់ប្រភពអាហារដ៏មានប្រយោជន៍ទាំងពីរនេះ ក៏ជួយកម្ចាត់ចោលនូវស្នាមជ្រីវជ្រួញដែលតែងតែជាទីសម្អប់របស់អ្នកបានទៀតផង៕
ប្រែសម្រួល៖ ស្រីពៅ ប្រភព៖ www.health.com
