ក្រុមហ៊ុន Apple ​ពេល​នេះ​កំពុង​សំងំ​ខ្លួន​ក្នុង​មន្ទីរ​ពិសោធន៍​ផលិតកម្ម​អេក្រង់​នៅ​តៃវ៉ាន់ ដើម្បី​ស្រាវជ្រាវ អភិវឌ្ឍ​បច្ចេកវិទ្យា​អេក្រង់​ទំនើប​កម្រិត​សម្រាប់​បំពាក់​លើ​ឧបករណ៍​អេឡិចត្រូនិក។ នេះ​បើ​ផ្អែក​តាម​សេចក្ដី​រាយការណ៍​ពី​គេហទំព័រ Bloomberg។ យ៉ាង​ហោច​មាន​មនុស្ស​ប្រមាណ ៥០នាក់​ ត្រូវ​គេ​អះអាង​ថា កំពុង​ធ្វើការ​ពាក់ព័ន្ធ​នឹង​គម្រោង​នៅ​ក្នុង​អគារ Longtan ដែល​ក្រុមហ៊ុន​នឹង​ផលិត​អេក្រង់​ឱ្យ​ស្ដើង​ជាង​មុន ភ្លឺ​ជាង​មុន និង​មាន​គុណភាព​ជាង​អេក្រង់ LCD ទៅ​ទៀត។  

Apple ត្រូវ​គេ​អះអាង​ថា បាន​ជួល​បុគ្គលិក​ពី​ក្រុមហ៊ុន Qualcomm និង​ក្រុមហ៊ុន​ផលិត​អេក្រង់​របស់​តៃវ៉ាន់ AU Optronics។ ក្រុមហ៊ុន​អាមេរិក​នេះ ចង​ផ្លាស់ប្ដូរ​ទៅ​ប្រើ​បច្ចេកវិទ្យា​អេក្រង់ OLED វិញ។ សូម​បញ្ជាក់​ថា​នាឡិកា Apple Watch គឺ​ជា​ផលិតផល​ដំបូង​របស់ Apple ដែល​ប្រើ​ប្រភេទ​អេក្រង់ OLED ខណៈ ដែល​ផលិតផល​ផ្សេងៗ​របស់ Apple ប្រើ​អេក្រង់ LCD។ កាលពី​ខែ​មុន​គេហទំព័រ Nikkei បាន​រាយការណ៍​ថា ក្រុមហ៊ុន LG មាន​រោងចក្រ​អេក្រង់ OLED ក្រោម​គម្រោង​វិនិយោគ​ប្រាក់ ៨,៧ពាន់​លាន​ដុល្លារ​សម្រាប់​បំពាក់​ទៅ​លើ iPhone ស៊េរី​ក្រោយៗ​របស់ Apple ដែល​អាច​សម្រេច​បាន​នៅ​ឆ្នាំ២០១៨ ខាង​មុខ ហើយ​អេក្រង់​ថ្មី​នេះ​នឹង​ស្ដើង​ជាង LCD ប៉ុន្តែ​ងាយ​កោង​ជាង LCD បន្តិច។

សូម​បញ្ជាក់​ថា បច្ចុប្បន្ន LCD និង OLED គឺ​ជា​បច្ចេកវិទ្យា​អេក្រង់​ឈាន​មុខ​និង​ទំនើប​ជាង​គេ​ក្នុង​ទីផ្សារ​ឧបករណ៍​អេឡិចត្រូនិក។ iPhone 6S/6S Plus ជា​ទូរស័ព្ទ​ដែល​បំពាក់អេក្រង់ LCD ល្អ​បំផុត ចំណែក Galaxy S6/S6 Edge ក៏​ជា​ទូរស័ព្ទ​បំពាក់អេក្រង់ OLED ល្អ​បំផុត​ដែរ៕