គន្លឹះជោគជ័យ ៦យ៉ាង ពីលោក John Paul Dejoria វិវឌ្ឍខ្លួនពីអ្នកក្រតោកយ៉ាកក្លាយជាមហាសេដ្ឋីពាន់លានដុល្លារ
John Paul Dejoria គឺជាមហាសេដ្ឋីអាមេរិកដែលបានវិវឌ្ឍខ្លួនចេញពីជីវិតក្រីក្រតោកយ៉ាក។ ដោយសារតែរស់នៅក្នុងជីវិតក្រក្រី លោកបានធ្វើជាអ្នកលក់Christmas Cards ដោយដើរលក់ត្រុកៗពីមួយកន្លែងទៅមួយកន្លែង តាំងពីអាយុ៩ឆ្នាំ។ ប៉ុន្តែការតស៊ូក្នុងជីវិតនេះ បានធ្វើឲ្យលោកក្លាយជាមហាសេដ្ឋីដែលមានទ្រព្យសម្បត្តិរហូតដល់៣ពាន់លានដុល្លារអាមេរិក។
នៅអាយុ១៩ឆ្នាំ លោកបានចូលធ្វើជាកងទ័ពជើងទឹក ក្រោយពេលបញ្ចប់ការងារជាទាហាន លោកតែងបន្តការងារផ្សេងទៀតនៅពេលទំនេរដោយធ្វើជាអ្នកលក់របស់របរផ្សេងៗ ពោលគឺ ឲ្យតែបានលុយ។ លោកមិនដែលបានបញ្ចប់ការសិក្សាខ្ពង់ខ្ពស់ដូចគេនោះទេ ដូច្នេះអ្វីដែលអាចធ្វើបានគឺត្រឹមតែ ធ្វើជាអ្នកលក់ និង បុគ្គលិកតូចតាចម្នាក់ប៉ុណ្ណោះ។ ក្រោយមកទៀតលោកបានចូលបម្រើការនៅក្នុងក្រុមហ៊ុនថែរក្សាសក់មួយ ដោយធ្វើត្រឹមជាបុគ្គលិកតូចតាចម្នាក់ប៉ុណ្ណោះ។
ប៉ុន្តែដោយសារតែវិស័យនោះ គឺ ជាអ្វីដែលលោកចូលចិត្តពីក្មេងមក បានធ្វើឲ្យJohn Paul Dejoriaខិតខំប្រឹងប្រែងធ្វើការយ៉ាងខ្លាំង រហូតត្រូវបានគេដំឡើងតំណែងក្នុងជួរគ្រប់គ្រងរបស់ក្រុមហ៊ុន។ ក្រោយមកទៀត ដោយហេតុបានទទួលបានបទពិសោធន៍គ្រប់គ្រាន់ ហើយមានចិត្តចង់រកស៊ីដោយខ្លួនឯងផងនោះ លោកJohn Paul Dejoriaបានសម្រេចចិត្តសហការជាមួយនឹងអ្នកជំនាញធ្វើសក់ម្នាក់ ដោយចូលហ៊ុនគ្នាក្នុងម្នាក់៣៥០ដុល្លារ ដើម្បីបើកកន្លែងរកដោយសារតែមានការខិតខំប្រឹងប្រែងរបស់លោក រួមជាមួយដៃគូ បានធ្វើឲ្យជីវិតកែប្រែទាំងស្រុង ពោលគឺពីមនុស្សក្រីក្រម្នាក់ ក្លាយជាមហាសេដ្ឋី។ លោកអ្នកបានដឹងរឿងរ៉ាវសង្ខេបទាក់ទងនឹងប្រវត្តិតស៊ូរបស់លោកJohn Paul Dejoriaរួចហើយ អ៊ីចឹងសូមទទួលយកចំណេះដឹងបន្ថែមទៀត ទាក់ទងនឹងគន្លឹះជោគជ័យរបស់មហាសេដ្ឋីរូបនេះ៖
- ធ្វើអ្វីដែលអ្នកផ្សេងមិនធ្វើ៖ បើចង់ជោគជ័យក្នុងជីវិត អ្នកមិនអាចធ្វើអ្វីមួយដែលមានមនុស្សរាប់រាយនាក់កំពុងព្យាយាមធ្វើដែរនោះទេ ព្រោះឱកាសជោគជ័យគឺមានតិចតួចខ្លាំងណាស់។
- ត្រូវតែត្រៀមខ្លួន រាល់ការបដិសេធ៖ ទម្រាំជោគជ័យ គឺគ្មាននរណាម្នាក់ដែលមិនត្រូវបានគេបដិសេធនោះឡើយ ព្រោះមនុស្សម្នាក់ៗសុទ្ធតែមានចំណេះដឹង ការគិត និង ចំណង់ចំណូលចិត្តផ្សេងៗគ្នា។ អ៊ីចឹងហើយបើអ្នកត្រូវបានគេបដិសេធ សូមកុំបាក់ទឹកចិត្ត ហើយត្រូវគិតថា វាជារឿងធម្មតាប៉ុណ្ណោះ។ អ្វីដែលសំខាន់នោះគឺត្រូវធ្វើកិច្ចការឲ្យល្អបំផុត ហើយព្យាយាមធ្វើរហូតជោគជ័យ។
- ធ្វើល្អដាក់អ្នកដទៃ ដូចដែលអ្នកចង់ឲ្យគេធ្វើល្អដាក់អ្នកវិញអ៊ីចឹង៖ ត្រូវចាំថា បើអ្នកធ្វើល្អដាក់គេ លទ្ធផលគឺគេអាចធ្វើល្អដាក់អ្នក ឬ ពេលខ្លះក៏មានធ្វើអាក្រក់ដាក់អ្នកវិញដែរ ប៉ុន្តែបើអ្នកធ្វើអាក្រក់ដាក់គេហើយនោះ ៩៩,៩ភាគរយ គឺគេប្រាកដជាធ្វើអាក្រក់ដាក់អ្នកមិនខាន។ អ៊ីចឹងហើយ ត្រូវព្យាយាមធ្វើល្អដាក់អ្នកដទៃឲ្យអស់ពីលទ្ធភាព ហើយមិនចាំបាច់រំពឹងអ្វីពីគេវិញនោះទេ ព្រោះពេលខ្លះការរំពឹងអាចធ្វើឲ្យខកចិត្ត។
- គេងឲ្យបានគ្រប់គ្រាន់៖ ត្រូវចាំថា បើអ្នកគេងមិនគ្រប់គ្រាន់នោះទេ វានឹងធ្វើឲ្យប៉ះពាល់ដល់ផលិតភាពរបស់អ្នកមិនខាន។ ជាពិសេសនោះវានឹងធ្វើឲ្យខូចសុខភាពផងដែរ។
- ក្រោកឡើង ហើយធ្វើអ្វីម្យ៉ាង៖ បើគេងគឺគេងឲ្យស្រួល និង ស្កប់ស្កល់ តែពេលភ្ញាក់ពីដំណេកហើយមិនត្រូវខ្ជិល ឬ ទម្រន់ច្រើននោះទេ គឺត្រូវតែធ្វើអ្វីម្យ៉ាងដែលមានប្រយោជន៍ (ប្រយោជន៍ខ្លួនឯង និង អ្នកដទៃ) ទើបធ្វើឲ្យជីវិតមានន័យ និង ឆ្ពោះទៅរកភាពជោគជ័យក្នុងជីវិត។
- ធ្វើទាន៖ ទោះបីជាអ្នកមានដល់កម្រិតណាក៏ដោយ នៅពេលស្លាប់ទៅគឺមិនអាចយកទៅជាមួយបាននោះទេ ដូច្នេះហើយកុំគម្រិះ។ ជួយបានគឺត្រូវតែជួយ ព្រោះ ធ្វើបែបនេះទើបជីវិតមានតម្លៃ និង រស់នៅប្រកបដោយសេចក្ដីសុខក្នុងចិត្ត៕
ដោយ៖ រតនា វិចិត្រ
