លោក​ ​​​Kazuo Inamoriមហាសេដ្ឋី​​ជប៉ុន​ និង ​ជា​ពុទ្ធសាសនិក​ គឺ​ស្ថាបនិក​របស់​ក្រុមហ៊ុនKyocera Corporation ​និង​KDDI Corporation ​​ហើយ​ក៏​ជា​ប្រធាន​ក្រុមហ៊ុន​អាកាសចរណ៍​ជប៉ុន​ផង​ដែរ​។ ​​​​មហាសេដ្ឋី​រូប​នេះ​បាន​បញ្ជាក់​​​​ភាព​ជោគជ័យ​ក្នុង​ជីវិត​ ឬ ​លទ្ធផល​​ក្នុង​ជីវិត​របស់​យើង​គឺ​បាន​មក​ពី​ធាតុ​ផ្សំ​ចំនួន​៣​យ៉ាង​៖ ​​លទ្ធភាព ​ ​​ការ​ខិតខំ​ប្រឹងប្រែង ​និង​អាកប្បកិរិយា​។ ​លោក​ ​​​Kazuo Inamori​ពន្យល់​ថា ​​លទ្ធភាព​ គឺ ​ជា​អ្វី​ដែល​យើង​មាន​​​ ដោយ​អាច​និយាយ​ថា ​មាន​តាំង​ពី​ធម្មជាតិ​ក៏​បាន​ ដូចជា​ សុខភាព​ ​​សមត្ថភាព​ខួរក្បាល​ ​​ ​​​​និង ​​រាងកាយ ​ ​ជា​ដើម​។ ​​ប៉ុន្តែ​បើ​មាន​តែ​លទ្ធភាព​ល្អ ដោយ​ឡែក​គ្មាន​ការ​ប្រឹងប្រែង​​វិញ គឺ​​​ជីវិត​នឹង​គ្មាន​លទ្ធផល​ល្អ​នោះ​ឡើយ​។ មាន​ន័យ​ថា ​​​បើ​​មាន​ខួរក្បាល​ល្អ​ហើយ តែ​ខ្ជិល​គិត​ ​ហើយ​មិន​ព្រម​បង្វឹក​វា​ឲ្យ​កាន់​តែ​ខ្លាំង ​នោះ​វា​នឹង​មិន​​បង្កើត​​ចេញ​ជា​លទ្ធផល​ល្អ​អ្វី​នោះ​ឡើយ​។​ ​​ ​យ៉ាង​ណា​ក៏​ដោយ ​បើ​មាន​តែ​​លទ្ធភាព​ល្អ ​និង ​​ការ​ខិតខំ​ប្រឹងប្រែង​ខ្លាំង​ហើយ តែ​នៅ​ខ្វះ​ចំណុច​​មួយ​គឺ​អាកប្បកិរិយានោះ ​គឺ​អ្វី​ក៏មិនអាចមានលទ្ធផលល្អនៅឡើយដែរ​។ ​សរុប​សេចក្ដី​បើ​អ្នក​ឆ្ងល់​ថា ហេតុ​អ្វី​បាន​ជា​ជីវិត​របស់​អ្នក​ទៅ​ជា​អ៊ីចឹង​ ​​សូម​ពិនិត្យ​មើល​ធាតុ​សំខាន់​ទាំង​៣​នេះ​ ថា​ខ្លួន​ឯង​​បាន​អនុវត្ត​បែប​ណា​ចំពោះ​ចំណុច​នីមួយៗ ពោលគឺ ​លទ្ធភាព ​ ​​ការ​ខិតខំ​ប្រឹងប្រែង ​និង​អាកប្បកិរិយា៕ ​​ ​ដោយ​៖ រតនា​ ​វិចិត្រ