សុភាសិតអាល្លឺម៉ង់៖ «កុំរិះគន់គេ បើខ្លួនឯងមិនទាន់ខុសពីគេ»
«កុំរិះគន់គេ បើខ្លួនឯងមិនទាន់ខុសពីគេ»។ នេះជាសុភាសិតរបស់ជនជាតិអាល្លឺម៉ង់ ដែលចង់ដាស់តឿនឲ្យមនុស្សព្យាយាមយកកញ្ចក់មកឆ្លុះមុខរបស់ខ្លួនឯងសិន មុនពេលហាមាត់និយាយរិះគន់អ្នកដទៃថា អ៊ីចេះមួយអ៊ីចុះមួយ។
ជាទូទៅ មានមនុស្សមួយចំនួនចូលចិត្តជំទាស់ ឬរិះគន់ថា គេមិនល្អនេះមិនល្អនោះ ហើយគួរតែធ្វើបែបនេះបែបនោះវិញ។ ប៉ុន្តែអ្វីដែលសំខាន់នោះ ពួកគេចូលចិត្តតែរិះគន់គេ ទាំងខ្លួនឯងគ្មានល្អត្រង់ណាឬ អាក្រក់ជាងគេទៅទៀតផងក៏មាន។ វាគ្មានតម្លៃនោះឡើយ បើអ្នកមិនមែនជាមនុស្សដែលគ្រាន់បើជាងគេ (មានន័យថា ធ្វើរឿងមិនល្អជាច្រើន) ហើយបែរជារិះគន់អ្នកដទៃនោះ។ វាជាធម្មតាទេ មនុស្សតែងតែមានគំនិតផ្សេងគ្នា ប៉ុន្តែត្រូវចាំថា មុននឹងនិយាយអ្វីមួយត្រូវគិតផងថា ខ្លួនឯងបានធ្វើល្អហើយឬនៅ ខណៈដែលកំពុងព្យាយាមថា គេអាក្រក់នោះ។
បើចង់ឲ្យសម្ដីដែលនិយាយទៅវាមានតម្លៃ (សម្ដីថ្លៃ)គឺត្រូវធ្វើខ្លួនឲ្យល្អ ដើម្បីធ្វើជាគំរូដល់អ្នកដែលធ្វើខុស មិនមែនខ្លួនឯងធ្វើខុស ហើយមិនទទួលស្គាល់កំហុស ឬព្យាយាមបិទបាំងកំហុស ហើយបែរជានិយាយថា គេខុសតែម្យ៉ាងគត់នោះទេ៕
ដោយ៖ រតនា វិចិត្រ
