ប្រយោជន៍ ៣យ៉ាងអំពីពីការភ្ញាក់ម៉ោង ៤ព្រលឹមសម្រាប់បង្កើនគុណភាពជីវិតដោយមិនចាំបាច់ខាតបង់ប្រាក់
តើអ្នកយល់ឃើញបែបណាចំពោះទម្លាប់ភ្ញាក់ម៉ោង៤ពីព្រលឹម? តើអ្នកសម្លឹងមើលឃើញផលប្រយោជន៍អ្វីខ្លះដែលអ្នកអាចទទួលបានពីរបស់ដែលមិនចាំបាច់ឲ្យអ្នកត្រូវខាតបង់ប្រាក់កាសចំណាយទៅលើវា ដើម្បីដោះដូរនឹងប្រយោជន៍ដែលទទួលបាននោះ? សម្រាប់មនុស្សធម្មតា ពួកគេនឹងមើលមិនឃើញពីភាពខុសប្លែកធំធេង ដែលពួកគេអាចទទួលបានពីការផ្លាស់ប្ដូរទម្លាប់នៃពេលវេលាភ្ញាក់ពីគេងជាប្រចាំរបស់ខ្លួន ទៅជាភ្ញាក់ម៉ោង៤ពីព្រលឹមនោះឡើយ ព្រោះពួកគេមិនមែនជាមនុស្សដែលពោរពេញដោយកម្លាំងដុតបញ្ឆេះចេញពីក្នុងយ៉ាងអស្ចារ្យ ដើម្បីជាថាមពលសម្រាប់ពួកគេឲ្យខិតខំដាំដុះ ស្រោចទឹក និងមើលថែទាំផ្កាឲ្យលូតលាស់ចេញជាផ្កាដ៏ស្រស់បំព្រងរីកសាយភាយក្លិនក្រអូបឈ្ងុយឈ្ងប់នោះឡើយ។ ហេតុផល៣យ៉ាងខាងក្រោមនេះ នឹងធ្វើការបញ្ជាក់ថាហេតុអ្វីការភ្ញាក់ម៉ោង៤ពីព្រលឹម គឺជាកត្តាកំណត់ភាពជោគជ័យក្នុងជីវិតអ្នក៖
១) អ្នកអាចចាប់ផ្ដើមថ្ងៃថ្មីនីមួយៗរបស់អ្នកជាមួយនឹងអ្វីដែលអ្នកជក់ចិត្តធ្វើបំផុត៖ ភាពរវល់នៅកន្លែងការងារជាប្រចាំថ្ងៃរបស់អ្នក ពិតណាស់ថាវាតែងជាដើមហេតុនៃការត្រឡប់មកផ្ទះ ដោយស្ពាយមកវិញនូវភាពនឿយហត់ អស់កម្លាំងកំហែង និងគ្មានថាមពលទាំងកាយនិងចិត្ត។ ប្រសិនបើអ្នក ផ្លាស់ប្ដូរទម្លាប់ភ្ញាក់ពីគេងរបស់អ្នកទៅម៉ោង៤ព្រឹកព្រលឹមវិញ អ្នកនឹងអាចប្រើប្រាស់ពេលវេលាបន្ថែមនោះ មកបំពេញកិច្ចការអ្វីដែលជាការជក់ចិត្តរបស់អ្នកបំផុត ស្របពេលនឹងភាពស្រស់ស្រាយ និងអារម្មណ៍ជ្រះស្រឡះពីព្រលឹមនាំមកឲ្យអ្នកផងនោះ អ្នកនឹងទទួលបាននូវកម្លាំងជំរុញចិត្ត ដែលបានពីការចាប់ផ្ដើមថ្ងៃថ្មីជាមួយជំនក់ចិត្តរបស់ខ្លួនពេញមួយថ្ងៃយ៉ាងមានប្រសិទ្ធភាព។
២) ចាប់ផ្ដើមដំណើររបស់អ្នកមុនអ្នកដទៃ៖ ស្របពេលដែលអ្នកផ្សេងទៀត កំពុងលង់លក់ស្កប់ស្កល់នៅក្នុងដំណេករបស់ពួកគេនៅឡើយ ការភ្ញាក់ពីព្រលឹមនៅម៉ោង៤ បានធ្វើឲ្យអ្នកចាប់ផ្ដើមបំពេញកិច្ចការងារ ដើម្បីសម្រេចទៅដល់គោលដៅនៅខាងមុខរបស់អ្នកមុនពួកគេបាត់ទៅហើយ។ របស់ដ៏មានតម្លៃដែលមិនចាំបាច់ឲ្យអ្នកត្រូវចំណាយប្រាក់កាសទៅលើវានេះ គឺជាពេលវេលានៃដំណើរការណ៍តក់ៗពេញបំពង់នៃការដុសខាត់ចំណេះ និងជំនាញខ្លួនឯង ឲ្យកាន់តែមុតស្រួចជាងមុនពីមួយថ្ងៃទៅមួយថ្ងៃ និងនាំមកនូវភាពជោគជ័យលេចឡើងខ្ពស់ត្រដែតហួសពីដៃគូប្រកួតរបស់អ្នកមិនខាន។
៣) វាជាពេលវេលាដ៏ស្ងប់ស្ងាត់ គ្មាននរណាម្នាក់មករំខានអ្នកបានទេ៖ ភាពមមាញឹករញ៉េរញ៉ៃឥតសណ្ដាប់ធ្នាប់នៃពិភពខាងក្រៅ តែងមានឥទ្ធិពលមកលើអ្នក ប៉ះពាល់ដល់ការសម្រេចចិត្តរបស់អ្នកចំពោះរឿងសំខាន់ទាំងឡាយនៅក្នុងជីវិត និងជាទូទៅតែងជាការសម្រេចចិត្តបែបទាន់ហន់ភ្លាមៗ និងជាលទ្ធផលនៃដំណើរជីវិតមិនរលូនរបស់អ្នក។ ត្រឡប់មកការទាញយកប្រយោជន៍ពីម៉ោង៤ព្រលឹមវិញ នៅក្នុងបរិយាកាសដ៏ស្ងប់ស្ងាត់ មិនទទួលការរំខានពីពិភពខាងក្រៅ និងជាពេលដែលអ្នកធ្វើការទំនាក់ទំនងផ្សារភ្ជាប់ខ្លួនអ្នកទៅនឹងពិភពខាងក្នុងរបស់អ្នក អ្នកនឹងបានគិតពិចារណាយ៉ាងស៊ីជម្រៅ ផ្ដោតអារម្មណ៍ស្មិងស្មាធិ៍ទៅលើរឿងសំខាន់ទាំងឡាយក្នុងជីវិតអ្នក និងធ្វើការសម្រេចចិត្តប្រកបដោយសុភវិនិច្ឆ័យបានត្រឹមត្រូវជាងមុន ព្រោះការសម្រេចចិត្តនោះបានឆ្លងកាត់ការគិតពិចារណាបានល្អិតល្អន់ មិនមែនផ្អែកតាមអារម្មណ៍ ទាន់ហន់ដូចកាលពីមុននោះឡើយ នៅពេលនោះជីវិតអ្នកនឹងដើរតាមគន្លង និងមានភាពស៊ីចង្វាក់គ្នាយ៉ាងល្អ៕
ប្រែសម្រួល៖ ស្រីពៅ
ប្រភព៖ addicted2success
