ទើបឡើងកាន់តំណែងបាន១ថ្ងៃ រដ្ឋមន្ត្រីការពារជាតិថ្មីអាមេរិក បញ្ជាឱ្យវាយប្រហារកម្ទេច ISIS ៣១ដង
រដ្ឋមន្ត្រីក្រសួងការពារជាតិថ្មីរបស់អាមេរិកលោក James Mattis ដែលទើបឡើងកាន់តំណែងបាន ១ថ្ងៃ បានបញ្ជាឱ្យកងកម្លាំងអាមេរិកវាយប្រហារមកលើកងកម្លាំង ISIS ចំនួន ៣១ដងនៅទឹកដីនៃប្រទេសអ៊ីរ៉ាក់ និងស៊ីរី។
ក្នុងការវាយប្រហារនេះ បើតាមការចុះផ្សាយពី DailyCaller បានឱ្យដឹងថា មានការប្រើយន្តហោះប្រយុទ្ធ យន្តហោះទម្លាក់គ្រាប់ និងយន្តហោះដែលបញ្ជាដោយអ្នកបើកបរពីចម្ងាយដោយការវាយប្រហារធ្វើឡើង ២៥ដងនៅស៊ីរី និង ៦ដងនៅអ៊ីរ៉ាក់ក្នុងរយៈពេលតែមួយថ្ងៃ។ នៅស៊ីរី វាយប្រហារ២ដងកម្ទេចកងកាំភ្លើងធំ ISIS នៅក្បែរក្រុង Bab និងការវាយប្រហារផ្សេងៗទៀតបានកម្ទេចទីតាំង ISIS ជាច្រើនកន្លែងទាំងនៅអ៊ីរ៉ាក់ និងស៊ីរី។
សូមបញ្ជាក់ថា ក្នុងពេលធ្វើយុទ្ធនាការបោះឆ្នោត លោកត្រាំបានប្រកាសថា ខ្លួននឹងកម្ទេច ISIS ក្នុងរយៈពេលខ្លីតាមតែអាចធ្វើទៅបាន។ នៅថ្ងៃកាន់អំណាចដំបូង លោកបានថ្លែងថា លោកនឹងបញ្ចុះបញ្ចូលមេទ័ពធំៗទាំងអស់របស់លោកឱ្យធ្វើផែនការច្បាស់លាស់មួយដើម្បីកម្ទេចក្រុម ISIS ម្ដងមួយៗ និងរហូតទាល់តែអស់នៅក្នុងរយៈពេល ៣០ថ្ងៃ៕
