គោលការណ៍គ្រប់គ្រងទាំង ១២ប្រការ របស់លោក Kazuo Inamori
ជាសហគ្រិន សប្បុរសជន និងស្ថាបនិកនៃក្រុមហ៊ុនKyocera និងក្រុមហ៊ុនKDDIមួយរូប លោក Kazuo Inamoriមានដើមកំណើតជាជនជាតិជប៉ុន និងកើតក្នុងឆ្នាំ១៩៣២ នៅលើទឹកដីនៃទីក្រុងKagoshimaរបស់ប្រទេសជប៉ុន។ លោកបានបញ្ចប់ការសិក្សាកម្រិតថ្នាក់បរិញ្ញាបត្រផ្នែកវិស្វកម្មក្នុងឆ្នាំ១៩៥៥ ពីសាកលវិទ្យាល័យKagoshima និងបន្តមកដោយធ្វើការជាអ្នកស្រាវជ្រាវសម្រាប់ឧស្សាហកម្មShofu ដែលជាឧស្សាហកម្មផលិតអ៊ីសូឡង់មួយនៅក្នុងទីក្រុងKyotoរបស់ប្រទេសជប៉ុន។
នៅខែមេសាឆ្នាំ១៩៥៩ ដោយរួមដៃគ្នាជាមួយប្រាក់វិនិយោគពីមិត្តភ័ក្ដិនៅសាលារបស់លោកប៉ុន្មាននាក់ ចំនួន៣លានយេន លោកក៏បង្កើតបានក្រុមហ៊ុនសេរ៉ាមិចមួយឈ្មោះថា Kyoto Ceramic Co., Ltd. ដែលបច្ចុប្បន្នមានឈ្មោះថា Kyocera Corporation។ ក្នុងឆ្នាំ១៩៨៤ នៅពេលរដ្ឋាភិបាលរបស់ជប៉ុន បានបើកចំហឲ្យមានឧស្សាហកម្មនិងក្រុមហ៊ុនឯកជនវិញ បុរសជាពុទ្ធសាសនិករូបនេះ បានចាប់យកឱកាសនេះ និងផ្ដួចផ្ដើមឲ្យមានក្រុមហ៊ុនDDIឡើង។ ក្រោយមក នៅខែតុលាឆ្នាំ២០០០ DDIត្រូវបានរួមបញ្ចូលគ្នាជាមួយKDD និងIDO បង្កើតបាននូវក្រុមហ៊ុនKDDIឡើង។ នៅខែកុម្ភៈឆ្នាំ២០១០ ក្នុងវ័យ៧៧ឆ្នាំរបស់លោក លោកបានក្លាយជានាយករបស់ក្រុមហ៊ុនអាកាសចរជប៉ុនមួយ (Japan Airlines) បច្ចុប្បន្នមានឈ្មោះថា Japan Airlines Co., Ltd. ដើម្បីស្ដារដំណើរការណ៍របស់ក្រុមហ៊ុនឡើងវិញក្រោយពីការក្ស័យធន។
ក្រៅពីមានតួនាទីជាសហគ្រិនដ៏ជោគជ័យមួយរូបហើយ លោកថែមទាំងជាសប្បុរសជនមួយរូប ដែលបានបង្កើតនូវអង្គការមិនយកប្រាក់កម្រៃមួយឈ្មោះថា Inamori Foundationក្នុងឆ្នាំ១៩៨៤ផងដែរ។ មិនតែប៉ុណ្ណោះ អង្គការដែលមានលោក Inamoriជាប្រធានមួយនេះ បានបង្កើតពានរង្វាន់អន្តរជាតិ ធ្វើឡើងជារៀងរាល់ឆ្នាំនៅរៀងរាល់ខែវិច្ឆិកា ដើម្បីផ្ដល់កិត្តិយសទៅដល់បុគ្គល ឬក្រុមណានៅទូទាំងពិភពលោក ដែលបានរួមចំណែកយ៉ាងធំធេងនៅក្នុងការអភិវឌ្ឍសហគមន៍ជុំវិញសកលលោក និងមនុស្សជាតិ។ គួរជាទីផ្ដល់ការគោរពដល់បុរសដែលតែងឲ្យតម្លៃលើគុណធម៌ចំពោះមនុស្សរូបនេះ ក្នុងឆ្នាំ២០១១ លោក Inamoriបានទទួលរង្វាន់មេដាយមាសរបស់Othmer (Othmer Gold Medal) សម្រាប់ការចូលរួមចំណែកយ៉ាងធំធេងក្នុងដំណើរការណ៍វិទ្យាសាស្ត្រ និងគីមីសាស្ត្រ។ ខាងក្រោមនេះដែរ គឺជាគោលការណ៍គ្រប់គ្រងទាំង១២ប្រការរបស់លោក Inamoriដែលតែងត្រូវបានលោកប្រតិបត្តិតាមយ៉ាងខ្ជាប់ខ្ជួនជារៀងរហូតមក និងនាំភាពជោគជ័យសម្រាប់រូបលោកក្នុងពិភពនៃការប្រកួតប្រជែងរបស់មុខជំនួញនេះ៖
១) បញ្ជាក់ឲ្យបានច្បាស់ពីគោលបំណង និងបេសកកម្មរបស់អ្នកនៅក្នុងការធ្វើជំនួញ។
២) កំណត់នូវគោលដៅប្រកបដោយភាពប្រាកដប្រជា។
៣) រក្សាទុកនូវកម្លាំងដុតបញ្ឆេះជំនក់ចិត្តនៅក្នុងបេះដូងរបស់អ្នកជានិច្ច។
៤) ត្រូវខិតខំប្រឹងប្រែងតស៊ូជាងនរណាៗទាំងអស់។
៥) ចំណូលត្រូវកម្រិតជាអតិបរមា ឯការចំណាយត្រូវកម្រិតជាអប្បបរមា។
៦) ការកំណត់តម្លៃ គឺជាការគ្រប់គ្រង។
៧) ភាពជោគជ័យជាការកំណត់ដោយឆន្ទៈដ៏មោះមុត។
៨) ត្រូវយកដួងវិញ្ញាណជាអ្នកប្រយុទ្ធជាប់នឹងខ្លួន។
៩) ត្រូវប្រឈមមុខនឹងឧបសគ្គលំបាកទាំងឡាយជាមួយភាពក្លាហាន។
១០) មានភាពច្នៃប្រឌិតជានិច្ចជាមួយកិច្ចការងាររបស់អ្នក។
១១) ត្រូវមានទឹកចិត្តល្អ និងប្រកាន់យកភាពស្មោះត្រង់។
១២) ត្រូវមានភាពសប្បាយរីករាយ និងសុទិដ្ឋិនិយមជានិច្ច។ ដាក់ក្ដីសុបិនដ៏អស្ចារ្យ និងក្ដីសង្ឃឹមដ៏អស្ចារ្យទាំងឡាយចូលទៅក្នុងជម្រៅបេះដូងនៃភាពបរិសុទ្ធរបស់អ្នក៕
ប្រែសម្រួល៖ ស្រីពៅ
ប្រភព៖ global.kyocera
