រឿងសំខាន់ៗ១០យ៉ាងដែលអ្នកគួរដឹងពីប្រទេសប្រ៊ុយណេ ដែលជាស្ដេចប្រេងនៅអាស៊ីអាគ្នេយ៍
ប្រទេសប្រ៊ុយណេ គឺជារដ្ឋតូចមួយស្ថិតនៅលើឆ្នេរសមុទ្រខាងជើងនៃកោះBorneoនៅភាគអាសីុអាគ្នេយ៍។ ត្បិតប្រទេសនេះតូចក៏ពិតមែន តែសម្បូរទៅដោយធនធានធម្មជាតិជាច្រើន ជាពិសេសប្រេង។ ខាងក្រោមនេះដែរ គឺជាការពិតទាំង១០យ៉ាងអំពីប្រទេសមួយនេះដែលអ្នកចាំបាច់គួរយល់ដឹង៖
១) តាមពិតប្រទេសប្រ៊ុយណេទទួលបានឯករាជ្យរបស់ខ្លួនពីប្រទេសអង់គ្លេសនៅថ្ងៃទី១ ខែមករា ឆ្នាំ១៩៨៤ ប៉ុន្តែពួកគេតែងតែអបអរសាទរការទទួលបានឯករាជ្យរបស់ខ្លួន នៅរៀងរាល់ខែមករា ថ្ងៃទី២៣ទៅវិញ។
២) យោងទៅតាមមូលនិធិរូបិយប័ណ្ណអន្តរជាតិ (International Monetary Fund) ប្រ៊ុយណេគឺជាប្រទេសដែលឈរលើលំដាប់ទី៥ ជាប្រទេសដែលមានជាងគេបំផុតក្នុងពិភពលោក។ សេដ្ឋកិច្ចរបស់ពួកគេជាចម្បងពឹងផ្អែកទៅលើធនធានទំនុកបម្រុងដូចជា ប្រេង ហ្គាស និងធ្យូងថ្ម។
៣) ស្ដេចរបស់ប្រទេសប្រ៊ុយណេ គឺជាស្ដេចដែលមានជាងគេបំផុតស្ថិតនៅលំដាប់ទី២នៅក្នុងពិភពលោក បន្ទាប់ពីស្ដេចរបស់ប្រទេសថៃ។ ទ្រង់មានរថយន្តលើសពី៥,០០០គ្រឿងឯណោះ។
៤) ប្រទេសប្រ៊ុយណេ ជាម្ចាស់កាន់កាប់លើតំបន់តូច២កន្លែងនៃកោះBorneo ដែលផ្ទៃដីសរុបរបស់តំបន់ទាំង២នេះបូកបញ្ចូលគ្នា មានប្រហាក់ប្រហែលនឹងផ្ទៃដីរបស់ទីក្រុង Norfolkរបស់អាមេរិក។
៥) ប្រជាជនសរុបរបស់ប្រទេសប្រ៊ុយណេមានត្រឹមតែ៤០៨,០០០នាក់ ដែលចំនួននេះមានតិចជាងចំនួនប្រជាជនសរុបក្នុងទីក្រុងLeicesterនៃប្រទេសអង់គ្លេសទៅទៀត។
៦) ប្រទេសប្រ៊ុយណេ បានចូលរួមក្នុងការប្រកួតកីឡាអូឡាំពិកដំបូងក្នុងឆ្នាំ១៩៨៨ ស្របពេលដែលគណៈប្រតិភូរបស់ពួកគេមានតែមួយរូប ព្រមទាំងមិនមាននូវកីឡាកររបស់ខ្លួនទៀតផង។
៧) ប្រទេសប្រ៊ុយណេ មិនធ្លាប់មានជ័យជម្នះលើពានរង្វាន់មេដាយអូឡាំពិក ឬពានរង្វាន់ណូបែលនោះឡើយ ទោះជាយ៉ាងណា ក្រុមកីឡាបាល់ទាត់របស់ពួកគេបានយកឈ្នះពានរង្វាន់ពីប្រទេសម៉ាឡេសីុ (The Malaysia Cup) ក្នុងឆ្នាំ១៩៩៩ផងដែរ។
៨) តាមវប្បធម៌របស់ប្រទេសប្រ៊ុយណេ ប្រជាជនពួកគេមិនធ្វើការចាប់ដៃជាមួយអ្នកដែលមានភេទផ្ទុយគ្នានោះឡើយ។
៩) នៅប្រទេសប្រ៊ុយណេ ការលើកចង្អុលដៃសម្រាប់ចង្អុលត្រូវបានចាត់ទុកជាភាពមិនសមរម្យមួយ ឯមេដៃត្រូវបានប្រើប្រាស់ជំនួសវិញ។
១០) កង្កែបមួយប្រភេទឈ្មោះ Belalong Tree គឺជាប្រភេទសត្វកង្កែបដ៏កម្រម្យ៉ាង ដែលអាចរកបានតែនៅក្នុងប្រទេសប្រ៊ុយណេតែប៉ុណ្ណោះ៕
ប្រែសម្រួល៖ ស្រីពៅ ប្រភព៖ express
