សួរខ្លួនឯងនូវសំនួរទាំងនេះ នឹងជួយឲ្យអ្នកអាចរកកន្លែងដ៏ល្អសម្រាប់រៀន រៀនអ្វីក៏ចេះ!
ទីកន្លែងសិក្សាល្អ គឺជាកត្តាដ៏សំខាន់មួយក្នុងការកំណត់ទៅលើប្រសិទ្ធភាពការសិក្សារបស់អ្នក។ ដំណើរការណ៍នៃការស្រូបយកចំណេះដឹង ចាំបាច់ទាមទារការផ្ចង់អារម្មណ៍ ប្រមូលអារម្មណ៍ឲ្យមូល ដើម្បីឲ្យគំនិតរបស់អ្នកហូរមកជាខ្សែ មានរបៀបរៀបរយតាមដំណាក់ៗ មិនរញ៉េរញ៉ៃ មានភាពច្របូកច្របល់វិលវល់ ប្រាសចាកពីប្រធានបទដែលកំពុងផ្ដោតលើនោះឡើយ។
ដើម្បីអាចទទួលលទ្ធផលបែបនេះបាន ពិតណាស់ថាអ្នកចាំបាច់ត្រូវការបរិយាកាសស្ងប់ស្ងាត់ ដែលផ្ដល់អារម្មណ៍ធូរស្រាល និងបើកឱកាសឲ្យគំនិតល្អៗទាំងឡាយហូរមកប្រៀបបាននឹងខ្សែទឹក ព្រមទាំងយល់បានយ៉ាងសីុជម្រៅពីអ្វីដែលអ្នកកំពុងសិក្សា។ ដោយសារទីកន្លែងសិក្សាមានសារៈសំខាន់សម្រាប់ប្រសិទ្ធភាពនៃការសិក្សារបស់អ្នកបែបនេះ ដូច្នេះថាតើទីកន្លែងសិក្សារបស់អ្នកអាចធ្វើឲ្យអ្នកឆ្លើយយល់ស្របចំពោះសំណួរដូចដែលបានសួរខាងក្រោមនេះទេ ?
១) «តើទីកន្លែងសិក្សារបស់អ្នកបញ្ចៀសអ្នកពីការរំខានដែរទេ» ? និង«តើការហាមប្រាមមិនឲ្យនិយាយទូរស័ព្ទ និងជជែកគ្នាលឺៗត្រូវបានអនុវត្តចេញពីស្មារតីភ្ញាក់រលឹករបស់បុគ្គលម្នាក់ៗនៅទីកន្លែងសិក្សានោះដែរទេ» ?
២) «តើទីកន្លែងសិក្សានោះផ្ដល់សម្ភារៈសម្រាប់ជាជំនួយដល់ការសិក្សា ក៏ដូចជាការស្រាវជ្រាវបន្ថែមរបស់អ្នកដែរឬទេ» ? «តើអ្នកតែងមានភាពងាយស្រួលក្នុងការស្វែងរកឯកសារជំនួយសម្រាប់ប្រើការក្នុងគោលដៅកិច្ចការសំខាន់ៗរបស់អ្នកដែរទេ» ?
៣) «តើទីកន្លែងសិក្សានោះមានទីធ្លាទូលំទូលាយគ្រប់គ្រាន់សម្រាប់អ្នកទុកដាក់អីវ៉ាន់ដែលត្រូវប្រើប្រាស់នៅលើតុ ព្រមទាំងសរសេរអត្ថបទកិច្ចការផ្សេងៗបានសមរម្យដែរទេ» ?
៤) «តើពន្លឺមានគ្រប់គ្រាន់សម្រាប់ឲ្យអ្នកមើលអក្សរបានងាយស្រួល ដោយមិនចាំបាច់ត្រូវខំប្រឹងសម្លឹងមើលទេ» ?
៥) តាមធម្មតា អាកាសធាតុក្ដៅនឹងធ្វើឲ្យអ្នកមានអារម្មណ៍ថាងងុយគេង ចំណែកឯអាកាសធាតុត្រជាក់ពេកនឹងធ្វើឲ្យការគិតរបស់អ្នកប្រព្រឹត្តទៅដោយមានដំណើរការណ៍យឺត និងមិនច្បាស់លាស់។ ដូច្នេះ «តើអាកាសធាតុនៅទីនោះផ្ដល់អារម្មណ៍ស្រស់ថ្លាដល់អារម្មណ៍អ្នក ក្នុងការប្រមូលអារម្មណ៍ផ្ដោតលើកិច្ចការរបស់អ្នកដែរទេ» ?
ប្រែសម្រួល៖ ស្រីពៅ ប្រភព៖howtostudy
