រឿងទាំង ៦ដែលការសិក្សានៅក្រៅប្រទេស នឹងជះឥទ្ធិពលមកលើជីវិតអ្នក
លោក Nelson Mandela លើកឡើងថា ការសិក្សារគឺជាអាវុធដ៏មានអានុភាពដែលអាចប្រើប្រាស់ដើម្បីផ្លាស់ប្តូរ ពិភពលោកបាន។ ដើម្បីអាចផ្លាស់ប្តូរពិភពលោកបាន ជាដំបូងយើងត្រូវផ្លាស់ប្តូរខ្លួនឯងជាមុនសិន។ ជាពិតណាស់ ការសិក្សាក្នុងប្រទេសគឺជាការសំខាន់មួយក្នុងការផ្លាស់ប្តូរផ្នត់គំនិត និងកសាងសមត្ថភាព។ ក៏ប៉ុន្តែយើងនឹង មានការផ្លាស់ប្តូរកាន់តែប្រសើរនៅពេលដែលយើងទៅសិក្សានៅក្រៅប្រទេស។
ខាងក្រោមនេះគឺជារឿងទាំង ៦ ដែលការសិក្សានៅក្រៅប្រទេស នឹងជះឥទ្ធិពលមកលើជីវិតអ្នក៖
១) ទស្សនវិស័យរបស់អ្នកនឹងមានលក្ខណៈជាសកល ជាការពិតណាស់ ពាក់ព័ន្ធនឹងការសិក្សានៅក្រៅប្រទេស យើងមិនត្រឹមតែទទួលបាននូវចំណេះដឹងថ្មីៗពីសាស្ត្រាចារ្យបរទេសនោះទេ ប៉ុន្តែយើងថែមទាំងបានជួបនូវមិត្តភក្តិថ្មីៗដែលមកពីគ្រប់ទីកន្លែងនៃពិភពលោក។ ការណ៍នេះហើយ ដែលនាំឱ្យយើងបានស្វែងយល់ពីវប្បធម៌-អរិយធម៌នៃបណ្តាប្រទេសនានា ព្រមទាំងទស្សនទានផ្សេងៗគ្នារបស់មិត្តភក្តិទាំងនោះ។
២. ឥរិយាបថរបស់អ្នកនឹងស្ថិតក្នុងកម្រិតស្តង់ដារអន្តរជាតិ ទម្រង់នៃឥរិយាបថរបស់មនុស្សម្នាក់ៗ គឺអាស្រ័យទៅលើទំនៀមទម្លាប់ និង បរិយាកាសជុំវិញខ្លួន។ តួយ៉ាង ឥរិយាបថនៃជនជាតិខ្មែរយើង គឺមានលក្ខណៈទន់ភ្លន់ តែរឹងមាំ។ ចំណែកឯឥរិយាបថរបស់ជនជាតិ ជប៉ុនគឺម៉ឺងម៉ាត់ ហើយឥរិយាបថរបស់ជនជាតិនៃសហគមន៍អឺរ៉ុបគឺសេរី តែច្បាស់លាស់។ ដូច្នេះហើយ នៅពេល យើងសិក្សានៅក្រៅប្រទេស នោះយើងនឹងរៀនសូត្រពីឥរិយាបថផ្សេងៗគ្នាទាំងនោះ ដែលនាំឱ្យយើងអាច សម្របខ្លួនបានក្នុងបរិបទអន្តរជាតិ។
៣. ក្នុងករណីខ្លះ ជំនាញភាសារបស់អ្នកនឹងឈានដល់កម្រិតខ្ពស់ ដូចដែលយើងបានដឹងស្រាប់ហើយថា ភាសាគឺជាយានក្នុងការសិក្សានៅក្រៅប្រទេស។ កម្មវិធីសិក្សា នីមួយៗ ទាមទារឱ្យអ្នកមានចំណេះដឹងផ្នែកភាសាកម្រិតបង្គួរ ទៅខ្ពស់ ដូចជាភាសាអង់គ្លេស បារាំង អាឡឺម៉ង់ ចិន កូរ៉េ ជប៉ុន។ល។ ការសិក្សាជំនាញឯកទេស ដែលតម្រូវឱ្យប្រើប្រាស់ភាសាណាមួយជាគោលនោះ នឹងនាំឱ្យអ្នកអាចមានឱកាសពង្រឹងភាសាមួយនោះជារៀងរាល់ថ្ងៃ។ ជាលទ្ធផល អ្នកនឹងមានភាពស្ទាត់ជំនាញ នៅក្នុងភាសានោះ ហើយអ្នកនឹងអាចប្រើប្រាស់វាក្នុងកម្រិតខ្ពស់បាន។
៤. ពាក្យសុំធ្វើការរបស់អ្នកនឹងមានភាពទាក់ទាញ ជាការពិតណាស់ សញ្ញាបត្រដែលទទួលបានពីក្រៅប្រទេស មិនត្រឹមតែបង្ហាញអំពីការអប់រំដែលមាន ស្តង់ដារអន្តរជាតិប៉ុណ្ណោះទេ ប៉ុន្តែវាថែមទាំងបង្ហាញឱ្យឃើញថាអ្នកកាន់សញ្ញាបត្រនេះគឺធនធានមួយដែលបាន យល់ដឹងពីបរិបទសង្គម និង វប្បធម៌នានានៃបណ្តាប្រទេសទាំងឡាយនៅលើពិភពលោក។ ហើយបច្ចុប្បន្ន ពិភពលោកគឺបាននិងកំពុងស្ថិតក្នុងបរិបទនៃសកលភាវូបនីយកម្ម ដែលធនធានមនុស្សនៃប្រទេសមួយចាំបាច់ ត្រូវយល់ដឹងពីសង្គម និង វប្បធម៌នៃប្រទេសផ្សេងៗ ដើម្បីអាចជំរុញឱ្យមានសកម្មភាពពាណិជ្ជកម្មជាអន្តរជាតិ និង ចូលរួមអភិវឌ្ឃសេដ្ឋកិច្ចជាតិ ក៏ដូចជាពិភពលោក។ ដូច្នេះហើយ សញ្ញាបត្រក្រៅប្រទេសរបស់អ្នកនឹងទាញ ចំណាប់អារម្មណ៍ពីសំណាក់ក្រុមហ៊ុន ក៏ដូចជាស្ថាប័ននានា។
៥. អ្នកនឹងមានមិត្តភក្តិថ្មីៗដែលអាចមានទំនាក់ទំនងយូរអង្វែង ដូចដែលបានរៀបរាប់ពីខាងដើម អ្នកនឹងបានជួបនូវមិត្តភក្តិថ្មីៗជាច្រើនដែលមកពីបណ្តាប្រទេសនៅលើ ពិភពលោក។ គ្រានោះហើយ អ្នកនឹងបានស្គាល់ពួកគេយ៉ាងជិតស្និត។ ហើយថាមិនបាន មិត្តភក្តិណាមួយក្នុង ចំណោមពួកគេទាំងនោះអាចនឹងក្លាយជាមិត្តភក្តិជិតស្និត ដៃគូរពាណិជ្ជកម្ម ឬក៏ដៃគូរជីវិតរបស់អ្នកដែលនឹង មានទំនាក់ទំនងយូរអង្វែងផងដែរ។
៦. អ្នកនឹងបង្កើតអនុស្សាវរីយ៍ដែលមិនអាចបំភ្លេចបាន យើងម្នាក់ៗតែងតែមានអនុស្សាវរីយ៍ជាមួយមិត្តភក្តិរបស់ខ្លួនកាលពីនៅជាសិស្ស ឬនិស្សិតមហាវិទ្យាល័យ ដែលអនុស្សាវរីយ៍ខ្លះដិតដាមជាប់ក្នុងការចងចាំរបស់យើងជារៀងរហូត។ មិនខុសគ្នាឡើយ នៅពេលដែលអ្នក កំពុងសិក្សាក្រៅប្រទេស អ្នកនឹងបង្កើតនូវអនុស្សាវរីយ៍ជាច្រើនជាមួយមិត្តភក្តិថ្មីៗ ដែលមកពីប្រទេសនានា។ អ្នកនឹងចងចាំអនុស្សាវរីយ៍ទាំងនោះជារៀងរហូត៕
