មិនធម្មតា! អ្នកមាន ៨ នាក់ ក្ដោបក្តាប់ទ្រព្យសម្បត្តិច្រើនជាងទ្រព្យសម្បត្តិប្រជាជនពាក់កណ្តាលផែនដីទាំងមូល
មហាសេដ្ឋីកំពូលៗក្នុងលោកចំនួន ៨ នាក់ ត្រូវបានគេរកឃើញថា ឥឡូវនេះបានកាន់កាប់ទ្រព្យសម្បត្តិច្រើនជាងទ្រព្យសម្បត្តិសរុបបញ្ចូលគ្នារបស់ប្រជាជននៅជុំវិញសាកលលោកចំនួន ៣,៦ ពាន់លាននាក់ទៅទៀត (ប្រជាជនសរុបរបស់ពិភពលោកបច្ចុប្បន្នជាង ៧,៤ ពាន់លាននាក់ )។ នេះបើយោងតាមរបាយការណ៍ចុងក្រោយរបស់អង្គការ Oxfam International បានបញ្ចេញឲ្យដឹងកាលពីថ្ងៃអាទិត្យកន្លងទៅ។
មហាសេដ្ឋីផុតលេខទាំង៨ រូបនោះរួមមានមហាសេដ្ឋីអាមេរិកលោក Bill Gates មហាសេដ្ឋី Warren Buffett មហាសេដ្ឋី Carlos Slim មហាសេដ្ឋី Jeff Bezos មហាសេដ្ឋី Mark Zuckerberg មហាសេដ្ឋី Amancio Ortega មហាសេដ្ឋី Larry Ellison និងមហាសេដ្ឋី Michael Bloomberg នៅពេលបច្ចុប្បន្ននេះមានទ្រព្យសម្បត្តិសរុបបញ្ចូលគ្នាស្មើនឹង ៤២៦ ពាន់លានដុល្លារឯណោះ។
ការបញ្ចេញរបាយការណ៍របស់អង្គការកំពូលរបស់ពិភពលោកខាងលើបានធ្វើឡើងស្របពេលដែលវេទិកាសេដ្ឋកិច្ចពិភពលោក (World Economic Forum) កំពុងរៀបចំធ្វើឡើងនៅក្នុងទីក្រុង Davos ប្រទេសស្វីស។ កិច្ចប្រជុំកំពូលប្រចាំឆ្នាំនេះ នឹងមានវត្តមានចូលរួមរបស់ក្រុមមេដឹកនាំកំពូលៗរបស់បណ្តាប្រទេសផ្សេងៗ និង អង្គការនានាមកពីជុំវិញពិភពលោក។
របាយការណ៍របស់អង្គការ Oxfam បានបន្តថា អ្នកមាន ១% បានគ្រប់គ្រងទ្រព្យសម្បត្តិច្រើនជាងប្រជាជនផ្សេងៗទៀតនៅជុំវិញពិភពលោកទាំងមូលចាប់តាំងពីឆ្នាំ ២០១៥ មកម្ល៉េះ ពោលគឺពួកគេក្តោប ក្តាប់ទ្រព្យសម្បត្តិស្មើនឹង ៤២% នៃទ្រព្យសម្បត្តិពិភពលោកទាំងមូល។ ក្នុងចំណោមអ្នកមានដែលជាមហាសេដ្ឋី ១ ៨១០ នាក់ មាន ៨៩% ជាបុរស។
ផ្អែកលើការលើកឡើងរបស់ស្ថាប័នខាងលើ តួលេខនេះ គឺបានបង្ហាញថា ពិភពលោកនៅពេលបច្ចុប្បន្នកំពុងប្រឈមមុខទៅនឹងវិសមភាពយ៉ាងខ្លាំងរវាងអ្នកមាននឹងអ្នកក្រ ដោយហេតុថា មានអ្នកមានតិចតួចគ្រងទ្រព្យសម្បត្តិដ៏ច្រើនមហាសាល ខណៈដែលអ្នកក្រដ៏ច្រើនលើសលប់កាន់កាប់ទ្រព្យសម្បត្តិតិចតួចប៉ុណ្ណោះ៕
ប្រភព៖ cnn
