អ្នកមាននិយាយថា អនុវត្តគន្លឹះ៥នេះនឹងធ្វើឲ្យអ្នកក្លាយជាអ្នកមានចាប់ពីពេល នេះតទៅ
លោកអ្នកអាចគិតថា បើចង់ក្លាយជាអ្នកមាន លុះត្រាតែមានចំណូលច្រើន រកស៊ីនេះរកស៊ីនោះ ឬ ខិតខំធ្វើការជាដើម។ សំនួរសួរថា ចុះបើលោកអ្នកបានអនុវត្តតាមមធ្យោបាយខាងលើនេះហើយ តែនៅតែក្រ តើនេះបណ្តាលមកពីអ្វី? នេះជាចម្ងល់មួយដែលអ្នកជោគជ័យហិរញ្ញវត្ថុ ឬ អ្នកពូកែរៀបចំគម្រោងហិរញ្ញវត្ថុ (Financial Planner) ជាច្រើនបានលើកឡើងថា បញ្ហានេះវាជាប់ពាក់ព័ន្ធទៅនឹងទម្លាប់ចាយលុយខុសទិសដៅប្រចាំថ្ងៃរបស់អ្នក ដែលអ្នកធ្លាប់គិតថា វាជារឿងកំប៉ិកកំប៉ុក។
លោក Tom Corley ដែលជាអ្នកនិពន្ធសៀវភៅទាក់ទិនទៅនឹងភាពជោគជ័យហិរញ្ញវត្ថុបានស្រាវជ្រាវក្រុមអ្នកមាន ដូចជា សេដ្ឋី និង មហាសេដ្ឋីជាច្រើនសុទ្ធតែបានលើកឡើងពីចំណុចមួយចំនួននៅខាងក្រោមនេះ។ វាជាវិថីឆ្ពោះទៅរកភាពមានបាន។ នេះជារឿងពិត ហើយកុំគិតថា វាគ្រាន់តែជាគន្លឹះសាមញ្ញនោះ។
១) សន្សំលុយដាក់ចូលក្នុងកាត ATM ជាប្រចាំ
វាជារឿងមួយងាយស្រួលនៅពេលលោកអ្នកមានកាត ATM សម្រាប់សន្សំប្រាក់របស់លោកអ្នក។ យោងតាមការលើកឡើងរបស់លោក Corley លោកអ្នកគ្រាន់តែដាក់លុយចូលក្នុងមួយខែ ១០០ ដុល្លារ ៥០ដុល្លារ ឬ ២០ដុល្លារជារៀងរាល់ខែក៏អាចសាងភាពមានបាន បានដែរ។ លោកពន្យល់ថា កាលដែលលោកអ្នកធ្វើបែបនេះ គឺដើម្បីជំនះការយកលេសខ្លួនឯងយកលុយបន្តិចបន្តួចនេះទៅចាយវាយផ្តេសផ្តាសទាំងមិនដឹងខ្លួន។ លោកបន្តថា បើអ្នកសន្សំបានកាន់តែច្រើន អ្នកនឹងមានជម្រើសកាន់តែច្រើនដើម្បីរកលុយ។ បើមានលុយសន្សំ វានឹងធ្វើឲ្យអ្នកអាចអោបក្រសោបឱកាសល្អផ្សេងៗ តែបើគ្មានលុយសន្សំ ឱកាសនឹងកន្លងផុតទៅជាមិនខាន។ លុយសន្សំនេះ អាចយកទៅវិនិយោគ បន្តនៅក្នុងវិស័យភាគហ៊ុន ឬ អចលនទ្រព្យជាដើម។
២) ប្រញាប់រាប់អានមនុស្សជោគជ័យបានកាន់តែឆាប់កាន់តែល្អ
«មនុស្សសំបូរធនធាន ឬ ហៅម្យ៉ាងថា បុគ្គលជោគជ័យ ពួកគេមានដែនកំណត់ និង បែបផែនច្បាស់លាស់លើប្រភេទមនុស្សដែលគួររាប់អាន។ គោលដៅរបស់ពួកគេគឺដាក់ចិត្តគំនិតរាប់អានមនុស្សដែលជោគជ័យដូចគ្នា»។ លោក Corley បានលើកឡើងដូច្នេះ។ តាមទស្សនៈរបស់លោក Corely លោកអ្នកត្រូវបង្កើតមិត្តភាពជាមួយបុគ្គលជោគជ័យឲ្យបានកាន់តែច្រើន ព្រោះបុគ្គលទាំងនេះអាចជួយបង្ហាញផ្លូវអ្នក ឲ្យសម្រេចគោលដៅរបស់អ្នកបាន។ ប៉ុន្តែបើអ្នកពិបាកទំនាក់ទំនងជាមួយបុគ្គលទាំងនេះ អាចចូលរួមជាមួយក្រុមមនុស្សដែលមានជំនាញវិជ្ជាជីវៈច្បាស់លាស់ក៏បានដែរ។
៣) ចំណាយពេល២០នាទីក្នុងមួយថ្ងៃដើម្បីអភិវឌ្ឍជំនាញថ្មីៗ
លោក Corley បានមានប្រសាសន៍ថា អ្នកមានជាប្រភេទមនុស្សដែលយកចិត្តទុកដាក់ខ្ពស់លើការអភិវឌ្ឍសមត្ថភាពរបស់ខ្លួន។ ដើម្បីទទួលបានពន្លឺលើជំនាញថ្មីៗនេះ ពួកគេអាចចូលរួមសិក្ខាសាលាផ្សេងៗ សិក្សាស្វែងយល់ ជួបជុំពិភាក្សាការងារ និង ចែករំលែកចំណេះដឹងទៅវិញទៅមកដើម្បីអភិវឌ្ឍសមត្ថភាពពួកគេ។ លោកបានបញ្ជាក់ត្រង់នេះថា ជាទូទៅមនុស្សខ្លះពិបាកសម្របខ្លួនទៅនឹងមជ្ឈដ្ឋាន ឬ បុគ្គលថ្មីៗដែលមានផ្នត់គំនិត គោលដៅ ជំនាញឬ ទស្សនៈផ្សេងពីខ្លួនណាស់។ ក៏ប៉ុន្តែ នៅពេលដែលលោកអ្នកអាចពង្រីកចំណេះដឹងក្រៅពីជំនាញគ្រឹះរបស់អ្នក នោះមានន័យថា ចំណេះដឹងរបស់អ្នកមានភាពរស់រវើក ស្របតាមបរបទ និងអាចប្រើការបានគ្រប់កាលៈទេសៈ។
៤) បំផុសផ្នត់គំនិតសន្សំសំចៃឲ្យបានជាអតិបរមា
តាមការស្រាវជ្រាវរបស់លោក Corley ការសន្សំសំចៃខ្លាំងពេករហូតដល់ដូចពាក់មួយគេនិយាយថា គម្រិះ ឬ រិះថាំនោះមិនចាយប្រាក់គិតតែពីសន្សំនោះទេ។ បើលោកអ្នកមានទម្លាប់បែបនេះមែន វាមិនអាចធ្វើឲ្យលោកអ្នកក្លាយជាអ្នកមានបានឡើយ ពីព្រោះថា របៀបក្លាយជាអ្នកមាន មានវិធីសាស្ត្រច្រើនយ៉ាងណាស់។ ប៉ុន្តែលោកបានបញ្ជាក់ថា អ្វីដែលលោកអ្នកត្រូវដឹងក្នុងចំណុចនេះនោះគឺថា តើពេលណាលោកអ្នកគួរចាយលុយ ពេលណាមិនគួរចាយលុយ។ នៅទីនេះលោកបានលើកឡើងពីប្រយោគចំនួន៣ស្តីពីការចាយវាយប្រាក់ប្រកបដោយភាពឈ្លៀសវៃ៖ -ដាច់ខាតត្រូវតែដឹងថា តើលុយហូរចេញពីហោប៉ៅរបស់ដោយរបៀបណា? -ទិញតែផលិតផល ឬ សេវាណាដែលមានគុណភាព -បើទៅផ្សារ ទិញអ្វីក៏ដោយ ត្រូវទិញឲ្យបានថោកបំផុត និងចំណាយឲ្យទាបបំផុតតាមដែលអាចធ្វើបាន។
៥) តាមដានឲ្យស្អិតលើខ្ទង់ចំណាយក្នុងថ្ងៃនីមួយៗឲ្យបានពេញមួយខែ
នេះជាសំនួររបស់លោក Corley៖« តើអ្នកមានបានដឹងទេថា លុយរបស់អ្នកបានរត់ចេញពីហោប៉ៅទៅណាខ្លះ?»។ អ្នកខ្លះគេដឹង ហើយពួកគេនោះគេហៅថា «អ្នកមាន»។ ការធ្វើបែបនេះដើម្បីឲ្យប្រាកដថា លុយដែលអ្នកបានចាយទៅ វាមានប្រសិទ្ធភាពឬអត់? តើអ្នកបានចាយលើអ្វីដែលឥតប្រយោជន៍ឬទេ? តើអ្នកខ្ជះខ្ជាយទេ? លទ្ធផលរបស់វានឹងធ្វើឲ្យអ្នកភ្ញាក់ផ្អើលជាមិនខាន៕ កុំភ្លេចសាកល្បងអនុវត្តគន្លឹះទាំងនេះទាំងអស់គ្នា!
ប្រភព៖ cnbc
