បើសុបិនឃើញរឿង៤យ៉ាងនេះ សូមកុំព្រងើយកន្តើយឲ្យសោះ
មនុស្សភាគច្រើនតែងមានការយល់ឃើញចំពោះការពន្យល់សប្ដិ ថាជាប្រផ្នូលនៃរឿងអ្វីមួយចូលក្នុងជីវិតពួកគេ ហើយមានជំនឿចងចាំតៗគ្នាមកតាមរយៈការកត់សម្គាល់នូវរឿងរ៉ាវដែលកើតឡើងចំពោះពួកគេ ក្រោយពីយល់សប្ដិឃើញហេតុការណ៍ណាមួយនៅក្នុងពេលដំណេករបស់ពួកគេ។ តាមពិតទៅ ការយល់សប្ដិដែលកើតឡើងក្នុងពេលយើងមិនដឹងខ្លួននោះ តែងព្យាយាមបង្ហាញអ្នកនូវការគិតដែលអ្នកមានចំពោះខ្លួនឯង និងចំពោះពិភពខាងក្រៅជុំវិញខ្លួនអ្នក ឬបើមិនដូច្នោះទេ រឿងរ៉ាវក្នុងយល់សប្ដិកំពុងព្យាយាមពញ្ញាក់ស្មារតីអ្នកអំពីហេតុការណ៍ណាមួយដែលអាចកើតឡើងចំពោះអ្នកនាពេលខាងមុខ។ ពិភពក្នុងយល់សប្ដិរបស់អ្នក តែងមានទំនាក់ទំនងជានិច្ចជាមួយនឹងពិភពរស់នៅពិតប្រាកដរបស់អ្នក។ ការគិត រាងកាយ និងវិញ្ញាណរបស់អ្នក វេញត្របាញ់ចូលគ្នា បង្កើតជាការជាប់ពាក់ព័ន្ធគ្នាក្នុងទំនាក់ទំនងយ៉ាងស្អិតរមួត។ ការពន្យល់សប្ដិទាំង៤យ៉ាងខាងក្រោមនេះ គឺជាអ្វីដែលអ្នកមិនគួរព្រងើយកន្តើយនោះឡើយ៖
១) ការស្លាប់៖ ការសុបិនឃើញពីសេចក្ដីស្លាប់ តែងត្រូវបានចាត់ទុកជាគ្រោះចង្រៃដល់បុគ្គលដែលសុបិនឃើញវា ប៉ុន្តែវាមិនមែនជារឿងអាក្រក់ដូចអ្វីដែលមនុស្សភាគច្រើនមានជំនឿនោះឡើយ។ ការសុបិនឃើញសេចក្ដីស្លាប់ កំពុងព្យាយាមប្រាប់អ្នកអំពីការបញ្ចប់នៃអ្វីមួយហើយ មិនថាជាការបញ្ចប់នៃអារម្មណ៍ខឹងសម្បារ ការបញ្ចប់នៃហេតុការណ៍ណាមួយក្នុងផ្នែកមួយនៃជីវិតអ្នក ឬក៏ជាការបញ្ចប់នៃការយល់ឃើញណាមួយ ដែលផ្ដល់ឱកាសដល់គំនិតថ្មីមួយទៀតចូលមកជំនួសវិញ។
២) ការមានគភ៌៖ សុបិនឃើញពីការពពោះ គឺជាការតំណាងពីការលេចឡើងនូវភាពរីកចម្រើន ឬការអភិវឌ្ឍដ៏ធំធេងណាមួយ ដែលអាចជាគម្រោងការនាពេលអនាគត ឬជាចំណង់ដ៏ខ្លាំងក្លាចំពោះអ្វីមួយ។ បើអ្នកសុបិនឃើញពីការមានគភ៌ អ្នកគួរសួរខ្លួនឯងបញ្ជាក់បន្ថែមនូវសំណួរដូចជា "តើអ្នកកំពុងតែព្យាយាមសម្រេចអ្វីឡើង?" "តើការផ្លាស់ប្ដូរអ្វីដែលអ្នកកំពុងតែជួបប្រទះនៅក្នុងពិភពរស់នៅពិតប្រាកដរបស់អ្នក?" "តើអ្នកសុបិនឃើញខ្លួនឯងពពោះព្រមទាំងមានលទ្ធភាពនៃអ្វីមួយដែលអាចកើតឡើងក្នុងពេលខាងមុខឬ?" ម្យ៉ាងទៀត ការសុបិនឃើញមានគភ៌នេះ ក៏អាចព្យាយាមបង្ហាញអ្នកពីគំនិតរីកចម្រើនណាមួយក្នុងការងារ និងសម្ពន្ធភាពរបស់អ្នកផងដែរ។
៣) ផ្ទះសម្បែង៖ បើអ្នកសុបិនឃើញផ្ទះសម្បែងវិញ វាជាការតំណាងពីអត្តា ខ្លួនអ្នកផ្ទាល់ និងទម្រង់ខុសៗប្លែកពីគ្នានៃអត្តចរិត ដោយអាស្រ័យទៅលើប្រភេទនៃផ្ទះ ឬបន្ទប់ដែលអ្នកឃើញក្នុងការពន្យល់សប្ដិ។ បើវាជាខ្ទម នោះវាជាការបង្ហាញអំពីការចងចាំលាក់បង្កប់ បើវាជាបន្ទប់ក្រោមដីវិញ វាជាការបង្ហាញអំពីគំនិតផ្ដួចផ្ដើម និងការគិតដោយឥតដឹងខ្លួន ឬអនុសម្បជញ្ញៈ។ ម្យ៉ាងទៀត អ្នកគួរសួរខ្លួនឯងបន្ថែមថា "តើអ្នកមើលថែខ្លួនឯងបែបណា?" និង"តើអ្នកសម្លឹងមើលចំពោះខ្លួនឯងបែបណាទៅកាន់ពិភពខាងក្រៅ?" ។
៤) ប្រាក់៖ ការសុបិនឃើញប្រាក់ អាចធ្វើឲ្យអ្នកភ្ញាក់មកជាមួយនឹងអារម្មណ៍នៃអំណរអរគុណ វាគឺជាការតំណាងឲ្យសំណាង និងរបៀបដែលអ្នកយល់ឃើញចំពោះតម្លៃរបស់ខ្លួនបែបណា។ បើអ្នកសុបិនឃើញឈ្នះរង្វាន់ វាជាតំណាងឲ្យការផ្លាស់ប្ដូរក្នុងរបៀបនៃការរស់នៅរបស់អ្នក រីឯការឲ្យលុយទៅអ្នកដទៃវិញ គឺជាតំណាងឲ្យភាពភ័យខ្លាចក្នុងការបាត់បង់អ្វីមួយ។ សុបិនឃើញប្រាក់ មានភាពជាប់ទាក់ទងដោយផ្ដាច់ពុំបានជាមួយនឹងអារម្មណ៍ផ្ទាល់ខ្លួនរបស់អ្នកសុបិនចំពោះភាពរុងរឿងនៃជីវិតទទួលបានពីទ្រព្យសម្បត្តិ។ សួរខ្លួនឯងថា "តើអ្នកមានបាត់បង់ការងារទេ?" ឬ "តើអ្នកមានជាប់ជំពាក់បំណុលអ្វីទេ?" ៕
ប្រែសម្រួល៖ ស្រីពៅ ប្រភព៖ powerofpositivity
