ទស្សនវិទូអាមេរិក លោកElbert Hubbard ៖ «មិត្តភ័ក្ដិគឺជាមនុស្សដែលដឹងពីអ្នកគ្រប់រឿង ហើយនៅតែស្រលាញ់អ្នក»
មិត្តភ័ក្ដិគឺពិតជាសំខាន់ខ្លាំងណាស់សម្រាប់មនុស្សគ្រប់គ្នា ពោលគឺសំខាន់មិនចាញ់គ្រួសារនោះឡើយ។ មិត្តភ័ក្ដិ គឺមិនពិបាករកនោះឡើយ ប៉ុន្តែ ចំពោះមិត្តល្អមិនងាយនោះទេ។
អ្នកខ្លះមានមិត្តច្រើនណាស់ ពោលគឺ ពេលទៅណាមកណាតែងមានការហែហម ឬ ទៅជាមួយគ្នាជានិច្ច ដែលមើលទៅហាក់ដូចជាអស្ចារ្យខ្លាំងណាស់។ ប៉ុន្តែនៅពេលមានទុក្ខម្តងៗ គឺរកតែម្នាក់គ្មាន ពោលគឺមិត្តម្នាក់ដែលអាចជួយរំលែកទុក្ខ ស្ដាប់រឿងក្នុងចិត្ត និង ជួយផ្ដល់ជាយោបល់ល្អៗដើម្បីដោះស្រាយបញ្ហាចំពោះមុខ។
អាចនិយាយយ៉ាងខ្លីបានតែ សម្បូរតែមិត្តរួមសុខ តែកម្រមានមិត្តរួមទុក្ខណាស់។ បើតាមទស្សនវិទូអាមេរិក គឺលោកElbert Hubbard បានលើកឡើងថា៖ «មិត្តភ័ក្ដិគឺជាមនុស្សដែលដឹងពីអ្នកគ្រប់រឿង ហើយនៅតែស្រលាញ់អ្នក»។ មិត្តល្អមិនមែនសំដៅលើមនុស្សដែលមានទ្រព្យសម្បត្តិច្រើន ឬ តែងខ្លួនឡូយឆាយនោះទេ ប៉ុន្តែគឺជាមនុស្សដែលផ្ដល់តម្លៃដល់អ្នក និង ដឹងច្បាស់ពីអ្នក។ មិត្តប្រភេទនេះគឺពិតជាមិនងាយរកនោះឡើយ តែបើអាចជួបមនុស្សប្រភេទនេះ គឺមានន័យថា ពិតជាមានសំណាងក្នុងជីវិត។
ដូច្នេះហើយប្រសិនបើអ្នកជួបមិត្តប្រភេទដែលមិនប្រកាន់ ពីស្ថានភាពឬ ធាតុរបស់អ្នក សូមកុំបោះបង់ ឬ ធ្វើរឿងមិនគប្បីដាក់គេឲ្យសោះ ព្រោះក្នុងមួយជីវិតនេះ មិនដឹងថា អាចជួបមនុស្សប្រភេទនេះបានប៉ុន្មាននាក់នោះទេ៕
ដោយ៖ រតនា វិចិត្រ
