ឆ្លងឆ្នាំលោកតាសាន់តាក្លូសបាញ់ប្រហារនៅ Istanbul ទួរគី ស្លាប់ ៣៥នាក់
អ្នកវាយប្រហារដែលស្លៀកសំលៀកបំពាក់ជាសាន់តាក្លូសបានបើកការបាញ់ប្រហារនៅក្នុងក្លឹបរាត្រីមួយនៅទីក្រុង Istanbul បន្ទាប់ពីឆ្លងឆ្នាំសកលនាពេលកណ្ដាលអធ្រាត្រយប់មិញដែលមានអ្នកស្លាប់ ៣៥នាក់ និងមានអ្នករបួសជាច្រើននាក់។
អភិបាលក្រុង Istanbul បានថ្លែងថា នេះជាការវាយប្រហារបែបភេរវកម្ម កើតឡើងនាម៉ោង ១;១៣ព្រឹកនៅក្នុងក្លឹប Reina ជាទីដែលមានមនុស្សជាង ៦០០នាក់ប្រារឰកម្មវិធីឆ្លងឆ្នាំថ្មីនៅទីនោះ។
លោក Sahin អភិបាលក្រុងខាងលើបានថ្លែងថា ៖«មានអ្នកវាយប្រហារម្នាក់បានបាញ់សម្លាប់ប៉ូលិសនៅខាងក្រៅ និងបន្ទាប់បាញ់អ្នកកម្សាន្តម្នាក់។ នៅខាងក្នុង អ្នកវាយប្រហារបានបាញ់រះយ៉ាងសាហាវឃោឃៅ គ្មានមេត្តាមកលើហ្វូងមនុស្សដែលកំពុងរីករាយឆ្លងឆ្នាំសកល»។
