វានឹងជាសមិទ្ធផលថ្មីដ៏អស្ចារ្យ ដែលសាធារណជនសុទ្ធតែកំពុងរង់ចាំមើល ថាតើទូរស័ព្ទអាចបត់បែនបាន ទំនើបយ៉ាងដូចម្ដេច ខណៈបច្ចុប្បន្នមានត្រឹមតែស្មាតហ្វូនកោងប៉ុណ្ណោះ។ Flexible ឬ foldable phone គឺជារឿងគួរចាប់អារម្មណ៍បំផុតធំមួយសម្រាប់យុគបច្ចេកវិទ្យាទំនើបនេះ។ បើតាមKolon Industries ដែលជាក្រុមហ៊ុនបច្ចេកវិទ្យាដ៏ធំ បង្ហាញជំនឿថា នឹងមានក្រុមហ៊ុនបច្ចេកវិទ្យាពី ៣ ទៅ ៥ ក្រុមហ៊ុន នឹងអភិវឌ្ឍបច្ចេកវិទ្យាទូរស័ព្ទបត់បែនបានក្នុងឆ្នាំ២០១៨។

យោងតាមសេចក្ដីរាយការណ៍ថ្មីមួយ បានលើកឡើងថា ស្មាតហ្វូនពត់ពែនបាននឹងបង្ហាញខ្លួននៅលើទីផ្សារប្រមាណ ២០% នៃទីផ្សារស្មាតហ្វូនទំនើប ក្នុងប្រទេសកូរ៉េខាងត្បូង។ អ្នកប្រហែលមិនធ្លាប់ឮឈ្មោះក្រុមហ៊ុន Kolon Industries ប៉ុន្តែក្រុមហ៊ុននេះ ក្ដោបក្ដាប់បាននូវក្បួនច្បាប់ក្នុងការបង្កើតស្មាតហ្វូនបត់បែន (foldable smartphone)។ បច្ចុប្បន្នក្រុមហ៊ុនកំពុងផលិតរូបធាតុ colorless polyimide ដែលជាធាតុសំខាន់មួយ ក្នុងការផលិត fordable device ដូចជា flexible film ដែលអាចជំនួសសន្លឹកកញ្ចក់រឹង (rigid glass sheets) ដែលមិនអាចឱ្យទូរស័ព្ទបត់បាននោះ។ យោងសេចក្ដីរាយការណ៍ពីគេហទំព័រ softpedia ឱ្យដឹងថា នៅឆ្នាំ២០១៨ អាចនឹងមានស្មាតហ្វូនអេក្រង់បត់បែនបានដូចសៀវភៅ (fordable device ) ចរាចរលើទីផ្សារប្រមាណ ១០០លានគ្រឿង ឯណោះ។ លោក Kang Chung-seok មកពី Kolon industries បានលើកឡើងថា ស្មាតហ្វូនបត់បែនដំបូងអាចនឹងបង្ហាញចេញអំឡុងឆ្នាំ២០១៧ ក្រោយនេះ ដែលវាអាចឱ្យគេបត់ជាកំណោងប្រវែង ៥មិល្លីម៉ែត្រ។ ក្រុមហ៊ុនកូរ៉េនេះ ទទួលបានជោគជ័យក្នុងការអភិវឌ្ឍ flexible colorless polyimide កាលពីសីហាកន្លងទៅ ហើយមានបំណងនឹងសម្រេចឱ្យបានសមិទ្ធផលសម្រាប់ផលិតស្មាតហ្វូន foldable ប្រមាណ ១០០លានគ្រឿងក្នុងឆ្នាំ២០១៨ ៕