កម្មវិធី chat របស់ Facebook ឥឡូវនេះ កាន់តែមានសុវត្ថិភាពខ្ពស់ ដោយក្រុមហ៊ុនទើបបញ្ចូលមុខងារ សន្ទនាសម្ងាត់ ដោយប្រើវិធីសាស្ត្រអ៊ិនគ្រីប។ មុខងារ Secret Conversation ថ្មីនៅលើ Messenger ពឹងផ្អែកលក់បច្ចេកវិទ្យា end-to-end encryption។

កាលពីមេសាកន្លងទៅ WhatsApp ដែលជាបុត្រសម្ព័ន្ធរបស់ Facebook ក៏ទើបបានបំពាក់មុខងារ end-to-end encryption នេះនៅលើកម្មវិធីឆាត (instant messenger) របស់ខ្លួនរួចមកហើយ។ ចំណែកក្រុមហ៊ុនបណ្ដាញសង្គមយក្ស ពេលនេះ ទើបបានបន្តបញ្ចូលមុខងារ សន្ទនាសម្ងាត់ (secret conversation) នៅលើ Facebook Messenger ថែមទៀត។

ការបញ្ចូលមុខងារ Secret Conversation នេះ គឺដើម្បីតែរក្សាសិទ្ធិបុគ្គលរបស់អ្នកប្រើប្រាស់បណ្ដាញសង្គម Facebook ដោយរឿងសម្ងាត់ៗផ្សេងៗ ដោយការសរសេរ chat នឹងត្រូវខ្ចប់ជិត មិនអាចឱ្យអ្នកទីបី អានបាន ក៏ដើម្បីសុវត្ថិភាពទិន្នន័យផងដែរ។ មុខងារសន្ទនាសម្ងាត់នេះ តម្រូវឱ្យអ្នកត្រូវចេះចូលទៅកន្លែងសន្ទនា (chatrooms) ដែលមាន Secret Conversation ហើយវានឹងមិនត្រូវបានរក្សាការសម្ងាត់ទេ ប្រសិនបើអ្នកគ្រាន់តែសន្ទនានៅក្នុង chatrooms ធម្មតា។ មិនតែប៉ុណ្ណោះ ក្រុមហ៊ុន Facebook ក៏បានបន្ថែមស្រទាប់សុវត្ថិភាព (Layer of security) មួយទៀត ទៅក្នុង Secret Conversation ឱ្យអ្នក អាចអានបទសន្ទនាដែលបានខ្ចប់ជិត (encrypted message) នៅលើឧបករណ៍មួយ ប៉ុណ្ណោះ៕