ក្នុងព្រឹត្តិការណ៍ក្រុមហ៊ុន Xiaomi សម្ពោធទូរស័ព្ទថ្មី Mi Note 2 នោះ ក្រុមហ៊ុនថែមទាំងបានបង្ហាញចេញគំរូ (concept) ស្មាតហ្វូនមួយម៉ូដែលទៀត យ៉ាងទំនើប ដោយមានការឌីហ្សាញស្អាតប្លែកភ្នែក ស្ទើរគ្មានគែម ពោលគឺផ្នែកខាងលើ និងសងខាង គឺក្រាលដោយកញ្ចក់អេក្រង់តែម្ដង។ ក្រុមហ៊ុន Xiaomi បានអះអាងមុខសាធារណជនថា ខ្លួនប្រាកដជានឹងផលិតបានស្មាតហ្វូនទំនើបនេះ នៅពេលអនាគត សម្រាប់ដាក់លក់លើទីផ្សារ។

គំរូស្មាតហ្វូនទំនើបនេះ មានឈ្មោះ Xiaomi Mi Mix ដែលភ្ជាប់មកជាមួយអេក្រង់ទំហំ ៦,៤អ៊ីញ ដែលស្ទើរតែគ្មានគែម (edgeless display) ពោលគឺក្រាលដោយកញ្ចក់អេក្រង់ប្រហែល ៩១,៣% ទៅហើយនៅផ្នែកខាងមុខទូរស័ព្ទ ក្រៅតែផ្នែកខាងក្រោមមានគែមក្រាសបន្តិចប៉ុណ្ណោះ។ គំរូស្មាតហ្វូនថ្មីនេះ នឹងបង្ហាញខ្លួនពិតប្រាកដជាមួយតួខ្លួនផលិតពីសេរ៉ាមិក ហើយបំពាក់ដោយឈីប Qualcomm Snapdragon 821 មាន RAM 4GB និងមេម៉ូរី 128GB។ ក្នុងនោះក៏មានម៉ូដែលផ្សេងមួយទៀតអមដោយ RAM 6GB មេម៉ូរី 256GB ថ្មកម្រិត 4400mAh អមជាមួយមុខងារសាកថ្មរហ័ស Quick Charge 3.0 និងមានកាមេរ៉ាក្រោយទំហំ 16MP។ Xiaomi Mi Mix នឹងមានតម្លៃលក់ចាប់ពី ៥១៦ដុល្លារ៕