Desire 10 Pro បន្ទាប់ពីលេចឮព័ត៌មានកន្លងមក ឥឡូវនេះត្រូវក្រុមហ៊ុន HTC សម្ពោធចេញផ្លូវការហើយ អមដោយលក្ខណៈ សម្បត្តិខ្ពស់ និងដំណើរការដោយប្រព័ន្ធប្រតិបត្តិការ Android ជំនាន់ចុងក្រោយ។ ស្មាតហ្វូនស៊េរីថ្មីរបស់ក្រុមហ៊ុនតៃវ៉ាន់នេះ បំពាក់ដោយឈីប MediaTek Helio P10 និងមាន RAM 4GB។

HTC Desire 10 Pro បានបំពាក់មកជាមួយអេក្រង់ទំហំ ៥,៥អ៊ីញកម្រិត Full HD 1920x1080px មានកាមេរ៉ាមុខទំហំ 13MP ឌីហ្សាញតម្រូវនឹងអ្នកដែលចូលចិត្តថតរូប selfie។ កាមេរ៉ាមុខនេះមានកម្រិត f/2.2 aperture និង BSI sensor plus អាចថតរូប selfie បានច្បាស់។ កាមេរ៉ាក្រោយរបស់វាមានទំហំ 20MP មាន BSI sensor, Laser Auto Focus, HDR និងជាច្រើនទៀត។

Desire 10 Pro ជាស្មាតហ្វូនប្រើស៊ីម២ មានកម្រិតថាមពលថ្ម 3000mAh។ វាមានមេម៉ូរីម៉ាស៊ីនទំហំ 64GB ហើយអាចបន្ថែមកាត microSD ដល់ 2TB។ យ៉ាងណា ក្រុមហ៊ុន HTC មិនបានបញ្ជាក់តម្លៃនៅលើ Desire 10 Pro នៅឡើយ ប៉ុន្តែគេរំពឹងថា វានឹងមានលក់នៅលើទីផ្សារចាប់ពីខែក្រោយ៕