សាធារណជនស្ទើរគ្រប់គ្នាប្រហែលមិនមានការភ្ញាក់ផ្អើលទៅលើ iPhone 7 គ្មានរន្ធកាស 3.5mm នោះឡើយ ដោយសារព័ត៌មានជាច្រើនបានចុះផ្សាយជាច្រើនខែ មុនពេល Apple សម្ពោធកំពូលទូរស័ព្ទជំនាន់ទី១០ នេះផ្លូវការ។ ផ្ទុយទៅវិញ អ្នកគាំទ្រ (fan) របស់ Apple មួយចំនួន បែរជាបង្ហាញការមិនពេញចិត្តចំពោះការដកចេញរន្ធកាសស៊េរីចាស់នេះទៅវិញ។ យ៉ាងណា ចំពោះកុំព្យូទ័រ MacBook Pro ជំនាន់ក្រោយ អាចមិនត្រូវក្រុមហ៊ុនដករន្ធកាស 3.5mm នោះទេ ព្រោះបើផ្អែកលើរូបបែកធ្លាយថ្មីៗ គេនៅតែឃើញមានរន្ធកាស 3.5mm នេះដដែល។

យោងតាមគេហទំព័រ MacRumors ឱ្យដឹងមកថា ក្រុមហ៊ុន Apple បានសង្កត់ធ្ងន់លើការអភិវឌ្ឍ ដោយបញ្ចូលមុខងារថ្មីៗទៅលើកុំព្យូទ័រ MacBook Pro ជំនាន់ថ្មី ដោយធ្វើការស្ទង់មតិពីអ្នកប្រើប្រាស់កុំព្យូទ័ររបស់ខ្លួន ថាតើពូកគេចង់បានមុខងារអ្វីថ្មីខ្លះ ដើម្បីរឹតតែផ្ដល់ភាពងាយស្រួលក្នុងការប្រើប្រាស់។

ក្រុមហ៊ុន Apple ត្រូវគេរំពឹងថា នឹងសម្ពោធស៊េរីកុំព្យូទ័រ MacBook Pro ថ្មីនៅអំឡុងខែតុលាក្រោយនេះ។ ហើយបើមើលតាមរូបបែកធ្លាយថ្មីៗ អំពីឡេបថបទំនើបនេះ គេសង្កេតឃើញ វានៅតែប្រើប្រាស់រន្ធកាស 3.5mm ដដែល។ ក្នុងនោះ ក៏មានរន្ធ USB ប្រភេទថ្មី Type-C ចំនួន៤ ផងដែរ។ រីឯរន្ធមេម៉ូរី SD នៅតែមាន, មានរន្ធ HDMI, រន្ធ USB-A និងតំណភ្ជាប់ MagSafe ផងដែរ។ ទោះជាយ៉ាងណា ពេលនេះពុំមានការអះអាងពីក្រុមហ៊ុន Apple នៅឡើយ ហើយគេក៏មិនប្រាកដថា រូបបែកធ្លាយគឺជា គំរូចុងក្រោយដែល Apple នឹងប្រើក្នុងការឌីហ្សាញ MacBook Pro នោះទេ។ ដូច្នេះ មានតែរង់ចាំដល់ថ្ងៃសម្ពោធឡេបថបស៊េរីថ្មីនេះ ផ្លូវការតែម្ដង។ គេរំពឹងថា Apple អាចនឹងធ្វើដូចនៅលើ iPhone 7 ប្រសិនមតិអ្នកគាំទ្រច្រើន ត្រូវការឱ្យក្រុមហ៊ុនដករន្ធកាស 3.5mm ចេញ៕