រូបថត ២សន្លឹកទើបត្រូវគេទម្លាយនេះ ត្រូវគេអះអាងថា ជាកំពូលស្មាតហ្វូន LeEco Le 2S របស់ក្រុមហ៊ុនបច្ចេកវិទ្យាចិន LeEco ដែលមានទំហំ RAM រហូតដល់ 8GB។ Le 2S ត្រូវបានគេបង្ហោះចូលបណ្ដាញសង្គមចិន Weibo ថ្ងៃនេះ បង្កើតការចាប់អារម្មណ៍ជាមួយទំហំ RAM ដល់ធំរបស់វា។ វាអាចជាកំពូលទូរស័ព្ទដំណើរការបានយ៉ាងរលូន និងបំពេញមុខងារបានយ៉ាងល្អ ជាមួយឈីបជំនាន់ក្រោយ Snapdragon 821 ហើយមានថាមពលថ្មខ្ពស់។

នេះមានន័យថា ទូរស័ព្ទនឹងរត់ក្នុងល្បឿនអង្គប្រតិបត្តិកម្រិត quad-core លឿនជាង Snapdragon 820 ១០%។ Le 2S បំពាក់ក្រាហ្វិក Adreno 530 GPU សមត្ថភាពខ្ពស់ ហើយនឹងមានមេម៉ូរីទំហំ 64GB។ សូមបញ្ជាក់ថា ស្មាតហ្វូនដំបូងដែលបានប្រើប្រាស់ RAM 6GB កន្លងមកគឺ ម៉ូដែល Vivo Xplay 5 ដែលត្រូវបានណែនាំកាលពីខែមីនាកន្លងទៅ។ ស្មាតហ្វូន Android ស្ទើរទាំងអស់ក្នុងពេលបច្ចុប្បន្នគឺបានអមមកជាមួយ RAM 4GB រួមទាំង Galaxy Note 7។ ទោះជាយ៉ាងណា ផេប្លេតពិសេសនេះ នឹងមានលក់នៅទីផ្សារចិន ជាមួយម៉ូដែល Note 7 RAM 6GB ដើម្បីប្រកួតប្រជែងទីផ្សារស្មាតហ្វូនទំនើបនៅចិន។ LeEco បាននិយាយថា ក្រុមហ៊ុននឹងចេញលក់ស្មាតហ្វូនទំនើប RAM 8GB នេះនៅលើទីផ្សារអាមេរិក ក្នុងពេលខាងមុខ។ យ៉ាងណា លក្ខណៈសម្បត្តិក្រៅពីនេះ មិនទាន់ត្រូវបានគេទម្លាយចេញនៅឡើយ។ មានតែរង់ចាំអ៊ុតមើលទាំងអស់គ្នា តើក្រៅពី RAM យក្សនៅមានអ្វីទៀតអស្ចារ្យនៅលើ LeEco Le 2S?