គ្រូបង្វឹក U16 ថៃ លោក Chaiyong Khumpian បានថ្លែងក្នុងសន្និសីទកាសែតនៅសណ្ឋាគារភ្នំពេញមុននេះបន្តិចថា សមាជិកវ័យក្មេងរបស់លោកអត់មានរបួសទេ ប៉ុន្តែ រឿងផ្លាស់ប្ដូរកីឡាករប៉ុន្មាននាក់ កាលឆ្នាំមុន ឬ អត់នោះ សុំលាក់សិន ព្រោះអាចថាជារឿងបច្ចេកទេសខ្លះៗ។ ការថ្លែងបែបនេះមុនពានរង្វាន់ AFF U16 Smart Championship 2016 ចាប់ផ្ដើមនាថ្ងៃស្អែកនៅកម្ពុជា។ គ្រូបង្វឹករូបនេះ គូសបញ្ជាក់ទៀតថា «យើងបានហ្វឹកហាត់ជុំគ្នា ត្រៀមពានរង្វាន់ AFF U16 នេះប្រហែល ២ ខែ។ យើងបានត្រៀមបានយ៉ាងល្អ ហើយ យើងនឹងអាចការពារជើងឯកបានទៀតឆ្នាំនេះ។» គួររំលឹកថា តាំងពីពាន AFF U16 ចាប់ផ្ដើមបង្កើតឡើងនាឆ្នាំ ២០០២ មក ថៃ លើកពានបានចំនួន ៣ សម័យ កាល ពោល ២០០៧ ២០១១ និង ២០១៥។ អ្វីដែលពិសេស នោះពេលកម្ពុជាធ្វើជាម្ចាស់ផ្ទះ ពីរ ថៃលើកពានទាំងពីរលើក នាឆ្នាំ ២០០៧ និង ២០១៥។ នៅថ្ងៃទី ១៣ កក្កដា ថៃ ដែលនៅពូល B ជាមួយកម្ពុជា ត្រូវប៉ះ ទីម័រខាងកើត វេលាម៉ោង ៣ កន្លះ នៅពហុកីឡដ្ឋានជាតិ បន្ទាប់ពី កម្ពុជា បើកឆាក ជួប ឡាវ ម៉ោង ៦ កន្លះល្ងាចនៅពហុកីឡដ្ឋានជាតិ ដូចគ្នា នាថ្ងៃទី ១១ កក្កដា។ ចំណែក ពូល A ចាប់ផ្ដើមប្រកួតស្អែកថ្ងៃទី ១០ កក្កដា មីយ៉ាន់ម៉ា ជួប អូស្ត្រាលី ម៉ោង ៣កន្លះ នៅ ស្តាតចាស់។ រីឯ ហ្វីលីពីន ប្រឈមនឹង សិង្ហបុរី ម៉ោង ៣ កន្លះ នៅពហុកីឡដ្ឋានជាតិ មុន ម៉ាឡេស៊ី ជួប វៀតណាម ម៉ោង ៦ កន្លះ នៅទីលានដដែល៕ ផ្ដល់សិទ្ធិ៖ sportrefresh