ផ្អែកតាមក្រុមហ៊ុនវិភាគទីផ្សារ Counterpoint Research ឱ្យដឹងថា Samsung ពេលនេះ គឺជាក្រុមហ៊ុនកំពូលដែលក្ដាប់បានចំណែកទីផ្សារធំជាងគេនៅសហរដ្ឋអាមេរិក។ ពីពេលមុន ក្រុមហ៊ុន Samsung បានបោះជំហាន ឈានមុខក្រុមហ៊ុន Apple រយៈពេល ១១ខែមកហើយ ប៉ុន្តែពេលនេះ គួរតែអរគុណដល់ស្មាតហ្វូន Galaxy S7 ដែលបានលើករាសី Samsung ខ្ពស់ឡើងមួយកម្រិតទៀត បន្តដឹកមុខគេនៅទីផ្សារអាមេរិក។

យោងតាមក្រុមហ៊ុនស្រាវជ្រាវដដែលនេះ ឱ្យដឹងទៀតថា Samsung ក្ដាប់ចំណែកទីផ្សារបាន ២៨,៨% គិតត្រឹមខែមីនា ខណៈ ដែល Apple បានត្រឹមលេខ២ ក្ដាប់បានតែ ២៣%។ មិនត្រឹមតែស្មាតហ្វូន Galaxy S7 បានជួយបង្កើនចំណែកទីផ្សារប៉ុណ្ណោះ ប៉ុន្តែវាក៏បានបង្ហាញខ្លួនជាមួយសមត្ថភាពគួរជាទីទាក់ទាញដល់អ្នកប្រើយ៉ាងខ្លាំងដែរ។ ងាកមកមើលចំណែកទីផ្សារក្រុមហ៊ុន LG គឺបានចំណាត់ថ្នាក់ទី៣ ក្ដាប់បាន ១៧,១%។ ក្នុងនោះស្មាតហ្វូនដែលបានជួយលើកស្ទួយក្រុមហ៊ុនគឺ LG G5 ។ គេរំពឹងថា ទៅថ្ងៃមុខ LG អាចនឹងធ្វើបានល្អជាងនេះ ហើយតាមប្រកិតនឹង Apple ជាប់។ ខណៈដែល Hawei បានចំណែកទីផ្សារត្រឹមតែ ១% នៅអាមេរិក ចំណែកក្រុមហ៊ុន ZTE បានចំណាត់ថ្នាក់លេខ៤ ក្ដាប់បាន ៦,៦% ផងដែរ។ រីឯក្រុមហ៊ុន Alcatel បានលេខ៥ មានចំណែកទីផ្សារ ៤,៥%៕