គម្រោងការណ៍ធំរយៈពេល ១០ឆ្នាំរបស់លោក Elun Musk ពេលនេះ ហាក់ចាប់ផ្ដើមលេចរូបរាងហើយ ដោយប្រធានក្រុមហ៊ុននេះ ទើបបានប្រកាសចេញរថយន្តដែលសាធារណជនរង់ចាំជាយូរមកហើយ គឺ Model 3 ជាប្រភេទរថយន្តស៊ីដានធុនកណ្ដាលប្រើអគ្គិសនី។ លក្ខណៈពិសេសនៅលើ Tesla Model 3 គឺជាអគ្គិសនីតម្លៃសមរម្យ តែសមត្ថភាពខ្ពស់ ក្រោយសាកអាគុយពេញអាចបើកបានចម្ងាយផ្លូវរហូតដល់ ៣៤៦គីឡូម៉ែត្រ។
រថយន្ត Hybrid ថ្មីនេះ នឹងមានលក់លើទីផ្សារចាប់ពីតម្លៃ ៣៥០០០ដុល្លារអាមេរិក ប៉ុន្តែសម្រាប់អតិថិជនប្រមាណជាង ១៣ម៉ឺននាក់ដែលបានធ្វើការបញ្ជាទិញរថយន្តទំនើបនេះ គឺត្រូវរង់ចាំយូរបន្តិច គឺរហូតដល់ចុងឆ្នាំ២០១៧ ទើបមានលក់លើទីផ្សារ។
លោក Musk បាននិយាយថា រថយន្ត Model 3 ធម្មតា (base model) នឹងមានល្បឿនសន្ទុះពី ០គីឡូ ទៅ ៩៦,៥គីឡូម៉ែត្រ/ម៉ោង គឺប្រើពេលមិនដល់ ៦វិនាទី ហើយអាគុយរបស់រថយន្ត ពេលសាកភ្លើងពេញនឹងអាចរត់បានចម្ងាយផ្លូវ ៣៤៦គីឡូម៉ែត្រ។ Model 3 នឹងអាចប្រើបានជាមួយស្ថានីយសាកភ្លើង Superchager របស់ Tesla។ អតិថិជននឹងភាពងាយស្រួលក្នុងការសាកភ្លើងរថយន្ត Tesla ស៊េរីថ្មីនេះ ព្រោះវាបង្ហាញខ្លួនក្រោយក្រុមហ៊ុន Tesla ធ្វើការអភិវឌ្ឍ ដាក់ចេញស្ថានីយសាកភ្លើងប្រមាណ ៧២០០កន្លែងនាពេលបច្ចុប្បន្ន។
Model 3 ជាប្រភេទរថយន្តប្រើកាឡេក្រោយ (rear-wheel drive) ហើយក៏មានជម្រើសម៉ូទ័រចំនួនពីរ (dual-motor) អមដោយកាឡេពេញ ឬកាឡេមុខក្រោយ (all-wheel drive) ផងដែរ។ វាក៏នឹងមានរួមបញ្ចូលមុខងារ Autopilot របស់ Tesla ផងដែរ។ នៅក្នុងរថយន្តមានបំពាក់អេក្រង់ទំហំ ១៥អ៊ីញប្រភេទ touchscreen។
ក្រុមហ៊ុន Tesla បានបញ្ជាក់ថា នឹងបន្ថែមមុខងារជាច្រើនទៀត ហើយនឹងបន្តអភិវឌ្ឍវាឱ្យរឹតតែទំនើប ទម្រាំ Model 3 នេះចេញលក់លើទីផ្សារនៅឆ្នាំ២០១៧ ខាងមុខ៕
