គន្លឹះសាមញ្ញទាំង៥ដែលអាចធ្វើឲ្យអ្នកក្រោកពីព្រលឹម ហើយស្រស់ស្រាយជានិច្ច
តើវាអស្ចារ្យយ៉ាងណានៅពេលដែលយើងចាប់ផ្ដើមធ្វើការយ៉ាងងាយស្រួលនិងសប្បាយចិត្តបន្ទាប់ពីធ្វើការហាត់ប្រាណ ទៅហូបកាហ្វេ អានសៀវភៅ ឬអាចជាអ្វីដែលអ្នកចូលចិត្តធ្វើ។ មានមនុស្សរអ៊ូរទាំពីការក្រោកពីព្រលឹមហើយត្រូវបំពេញការងារជាច្រើនផងដែរតែអ្នកប្រហែលជាអស់បញ្ហាទៀតហើយបើសិនជាអ្នកអាចអនុវត្តតាមវិធីធម្មតាៗខាងក្រោមនេះ៖
១) ស្គាល់ពីអ្វីដែលជាការលើកទឹកចិត្តរបស់អ្នក៖ បើសិនជាអ្នកដឹងថាអ្វីដែលអាចធ្វើឲ្យអ្នកអាចក្រោកពីព្រលឹមបានវាគឺជាការល្អបំផុត តែបើអ្នកមិនទាន់ដឹងទេអ្នកគួរស្វែងរកហេតុផលមួយសម្រាប់ខ្លួនអ្នកទៅ។ ហេតុផលនោះអាចជាហេតុផលធម្មតាដូចជាអ្នកចង់ក្រោកធ្វើអាហារឲ្យក្រុមគ្រួសាររបស់អ្នកជាដើម។
២) គេងឲ្យបានគ្រប់គ្រាន់ចាប់ពី៧ទៅ៩ម៉ោង៖ មានមនុស្សជាច្រើនដែលបានរអ៊ូរទាំថាខ្លួនពុំមានដំណេកគ្រប់គ្រាន់នោះទេដោយសារតែមានមមាញឹកពេកមិនថាជាសិស្សានុសិស្សឬអ្នកធ្វើការនោះទេ។ មិនថាអ្នករវល់យ៉ាងណាក៏ដោយ អ្នកគួរតែសម្រាកឲ្យបានគ្រប់គ្រាន់ ព្រោះវាជាមូលហេតុមួយដែលនឹងធ្វើឲ្យអ្នកអាចក្រោកពីព្រលឹមដោយមានភាពស្រស់ស្រាយ។
៣) បង្កើតទម្លាប់សម្រាកឲ្យគ្រប់គ្រាន់ ជាពិសេសនៅពេលល្ងាច៖ អ្នកអាចធ្វើអ្វីដែលអ្នកគិតថា អាចធ្វើឲ្យអ្នកសប្បាយចិត្តដូចជាដើរស្រូបយកខ្យល់អាកាសបរិសុទ្ធ តាំងសមាធិ ធ្វើការហាត់ប្រាណ ឬអានសៀវភៅជាដើម។ ការធ្វើបែបនេះធ្វើឲ្យអ្នកឆាប់គេងលក់ស្រួលហើយក៏ធ្វើឲ្យអ្នកឆាប់ក្រោកផងដែរ។
៤)បិទគ្រឿងអេឡិចត្រូនិកចោល៖ អ្នកគួរតែព្យាយាមទុកវាឲ្យឆ្ងាយពីខ្លួនឬកុំប្រើប្រាស់វាឲ្យសោះ ព្រោះថាវាមិនត្រឹមតែប៉ះពាល់ដល់ដំណេកអ្នកតែប៉ុណ្ណោះទេ វាថែមទាំងធ្វើឲ្យប៉ះពាល់ដល់ខួរក្បាលថែមទៀតផងគឺធ្វើឲ្យខួរក្បាលរបស់អ្នកស្ពឹកនិងមិនសូវមានការចងចាំល្អនោះទេ។
៥) ត្រូវតែភ្ញាក់នៅពេលឮម៉ោងរោទ៍៖ ជាទូទៅមិនថាអ្នកណានោះទេតែងតែមានទម្លាប់អាក្រក់ដោយបិទម៉ោងរោទ៍ចោលនៅពេលដែលឮសំឡេងវា ដែលជាហេតុធ្វើឲ្យពួកគេតែងខកម៉ោងជារឿយៗមិនថាពួកគេដាក់ម៉ោងរោទ៍យ៉ាងណាក៏ដោយ។
ប្រែសម្រួល៖ តូច ម៉ាយ៉ារស្មី
ប្រភព៖ www.lifehack.org
