អ្នកជំនាញព្យាករណ៍ថា វិស័យអចលនទ្រព្យកម្ពុជានឹងមានសន្ទុះយឺតបើធៀបនឹងឆ្នាំ២០១៩
បើនិយាយដល់វិស័យអចលនទ្រព្យគឺសំដៅទៅលើច្រើនផ្នែកដែលរួមមានទាំង វិស័យសំណង់ ដីឡូតិ៍ ឧស្សាហកម្មខុនដូរ ផ្ទះល្វែង និងបុរីជាដើម។ វិស័យនេះបានផ្សារភ្ជាប់យ៉ាងសំខាន់ជាមួយនឹងវិស័យសេដ្ឋកិច្ច ព្រោះប្រសិនបើវិស័យសេដ្ឋកិច្ចជួបប្រទះបញ្ហា នោះវិស័យអចលនទ្រព្យក៏នឹងទទួលរងនូវផលប៉ះពាល់ផងដែរ។
ជាមួយគ្នានេះ លោក សន សៀប ស្ថាបនិក និងជាប្រធានក្រុមហ៊ុនអចលនទ្រព្យ Key Real Estate បានលើកឡើងថា តាមការព្យាករណ៍របស់លោក វិស័យអចលនទ្រព្យកម្ពុជាក្នុងឆ្នាំ២០២០នេះអាចនឹងមានកំណើនយឺតជាងឆ្នាំ២០១៩ ដោយការលើកឡើងនេះលោកផ្នែកទៅតាមមូលហេតុនិងកត្តាសំខាន់ខាងក្រោម។
ក្នុងបទសម្ភាសន៍ផ្ទាល់ជាមួយអ្នកសារព័ត៌មាន លោក សន សៀប បានលើកឡើងថា ចំណុចសំខាន់ទីមួយដែលជំរុញឲ្យប៉ះពាល់គឺ ដោយសារការផ្ទុះជំងឺឆ្លងថ្មី(កូរ៉ូណាវីរុស) បានបណ្ដាលឲ្យមានការផ្អាកជើងហោះហើរពីបណ្ដាប្រទេសជាច្រើន ជាពិសេសសម្រាប់កម្ពុជា គឺជាប្រទេសដែលទទួលទេសចរណ៍ចិនច្រើន ដូច្នេះនៅពេលដែលគេបិតបែបនេះ វាក៏ជាផ្នែកមួយធ្វើឲ្យប៉ះពាល់ដល់សេដ្ឋកិច្ចផងដែរ។
ចំណុចសំខាន់មួយទៀតគឺនៅពេលដែលបិទហ្គេមអនឡាញ បានជំរុញឲ្យជនជាតិចិនចាកចេញពីកម្ពុជា និងមួយទៀតគឺការនិយាយពីផលអវិជ្ជមាននានា ក៏បានបង្កឲ្យមានផលប៉ះពាល់ផងដែរដល់វិស័យអចលនទ្រព្យកម្ពុជា ព្រោះវានឹងធ្វើឲ្យអ្នកវិនិយោគដែលក្រៅពីជនជាតិចិន និងខ្មែរ ពន្យារពេលក្នុងការវិនិយោគដោយរង់ចាំមើលសភាពការណ៍ជាមុនសិន ទើបសម្រេចចិត្តវិនិយោគជាក្រោយ។ ទាំងនេះគឺជាកត្តារួមផ្សំ ដែលអ្នកជំនាញគិតថា ជាដើមហេតុដែលនាំឲ្យវិស័យអចលនទ្រព្យកម្ពុជាក្នុងឆ្នាំ២០២០ មានសន្ទុះយឺតជាងឆ្នាំ២០១៩។
គួរបញ្ជាក់ផងដែរថា កាលពីថ្ងៃទី៣០ មករា ឆ្នាំ២០២០កន្លងទៅ ក្រសួងសេដ្ឋកិច្ចបានបង្ហាញរបាយការណ៍ព្យាករណ៍នូវកំណើនសេដ្ឋកិច្ចថា នៅឆ្នាំ២០២០នេះ សេដ្ឋកិច្ចកម្ពុជានិងកើនក្នុងរង្វង់៦%ប៉ុណ្នោះ ខណៈកាលពីមុនក្រសួងព្យាករណ៍ថា ៦,៥%។ ការថមថយនេះ បន្ទាប់ពីសង្កេតឃើញកត្តាប្រឈមពីការផ្ទុះឡើងនៃវីរុសកូរ៉ូណានៅប្រទេសចិន៕
ដោយ៖ ជួប ស្រីរ័ត្ន
