កូរ៉េខាងជើង កំពុងរៀបចំបាញ់មីស៊ីលជាថ្មី
កូរ៉េខាងជើង កំពុងរៀបចំការបាញ់គ្រាប់មីស៊ីលនាពេលឆាប់ៗខាងមុខ ខណៈពេលដែលរដ្ឋាភិបាលប្រទេសនេះបានចេញសេចក្តីប្រកាស មិនឲ្យមានការធ្វើដំណើរតាមតំបន់សមុទ្ររបស់ខ្លួន។ នេះបើតាមការចុះផ្សាយរបស់បណ្ដាញសារព័ត៌មាន Yonhapរបស់កូរ៉េខាងត្បូង។
រដ្ឋាភិបាលទីក្រុងព្យុងយ៉ាង បានចេញសេចក្តីប្រកាសមិនឲ្យប្រជាជនរបស់ខ្លួន ធ្វើដំណើរតាមតំបន់សមុទ្រនៅតំបន់ក្បែរកំពង់ផែWonsan ចាប់ពីថ្ងៃទី១១ ខែវិច្ឆិកា រហូតដល់ថ្ងៃទី៧ខែតុលា។
តាមរយៈការប្រកាសនេះ គេសន្និដ្ឋានថា កូរ៉េខាងជើងទំនងជារៀបចំការបាញ់គ្រាប់មីស៊ីលជាមិនខាន ព្រោះវាជាអ្វីដែលប្រទេសនេះធ្លាប់ធ្វើកន្លងមក ។
ជុំវិញបញ្ហានេះដែរ ខាងរដ្ឋាភិបាលកូរ៉េខាងត្បូងកំពុងតាមដាន ស្ថានភាពនេះផងដែរដើម្បីប្រាកដថា វាមិនបង្កបញ្ហាសន្តិសុខដល់ប្រទេសរបស់ខ្លួន ខណៈភាពតានតឹងរវាងភាគីទាំងពីរមិនទាន់អាចរសាយនៅឡើយ។
សូមបញ្ជក់ថា កូរ៉េខាងជើងបានរងទណ្ឌកម្មជាច្រើនពីសំណាក់អង្គការសហប្រជាជាតិ និង ប្រទេសមហាអំណាចជុំវិញ កម្មវិធីនុយក្លេអ៊ែររបស់ខ្លួន។ យ៉ាងណាក៏ដោយ រដ្ឋាភិបាលទីក្រុងព្យុងយ៉ាង មិនបោះបង់កម្មវិធីនុយក្លេអ៊ែរនេះឡើយ បើទោះបីជាទទួលទណ្ឌកម្មច្រើនក្តី៕
ដោយ៖ អ៊ុន ភក្តី
ប្រភព៖ Reuters
